Тошкент шаҳар ҳокимлиги ҳузуридаги Рақамли ривожланиш департаменти томонидан географик объектлар (кўчалар, тор кўчалар, берк кўчалар ва бошқалар)га ном бериш ва номларини ўзгартириш бўйича фуқаролардан таклифлар қабул қилиш ҳамда энг яхшилар учун овоз бериш учун веб-сайт (geonom.tashkent.uz) ишга туширилди.
Пойтахт ҳокимлиги матбуот хизмати сайт ҳозирча тест режимида ишлаётганини маълум қилди.
Ҳозирда сайт Тошкент шаҳридаги ер усти метро линиясидаги бекатларга ном бериш бўйича таклифлар йиғмоқда. Овоз беришга қўйилган объектлар харитада кўрсатилади ва фотосуратлар, шунингдек қисқача изоҳ билан бирга кўрсатилади.
Тошкент шаҳрида географик объектларни номлаш билан Географик объектларни номлаш ва қайта номлаш масалалари бўйича Тошкент шаҳар комиссияси шуғулланади. Шаҳар комиссияси нафақат аҳолининг фикрини инобатга олади ёки кўча, хиёбон, маҳалла ва майдонларга мос ном танлайди, балки архив, картографик ва бошқа тарихий маълумотларни ўрганади, доимий равишда соҳа мутахассисларини, масалан, тарихчи, этнограф, географ ва тилшуносларни жалб қилади, қарор қабул қилишда маҳаллий ҳокимият органларига, ташкилот ва корхоналарга зарур бўлган маълумотларни олиш учун мурожаат этади.
Ноябрь ойи бошида Ўзбекистон президенти Шавкат Мирзиёев географик объектларга ном бериш тўғрисидаги қонунга ўзгартириш ва қўшимчалар киритиш ҳақидаги ҳужжатни имзолаганди. Қонун географик объектларга ном бериш ва уларни қайта номлашда маҳаллий аҳолининг фикрини ҳисобга олиш тартибини белгилайди.
Аҳоли пунктларининг таркибий қисмларига (маҳаллалар, хиёбонлар, кўчалар, майдонлар, боғлар, хиёбонлар) нафақат Ўзбекистон, балки жаҳон тарихида чуқур из қолдирган шахсларнинг номларини бериш имконияти ҳам муҳим ўзгариш бўлганди. Гарчи кўплаб объектлар таниқли шахслар — Александр Пушкин, Лев Толстой, Шота Руставели, Юрий Гагарин ва бошқалар номи билан аталган бўлсада, илгари бунга қонун йўл қўймасди.
