Hukumatning 4 iyuldagi [353-son] qarori bilan Avtomototransport vositalari haydovchilarini tayyorlash, qayta tayyorlash va ularning malakasini oshirishni amalga oshiruvchi ta’lim tashkilotlarining reytingini aniqlash tartibi to‘g‘risidagi nizom tasdiqlandi. Bu haqda Adliya vazirligi xabar berdi.
Hujjat «O‘zbekistonda haydovchilarini tayyorlash, qayta tayyorlash va ularning malakasini oshirish tizimini tubdan takomillashtirish» hamda «sog‘lom raqobat muhitini yaratish, ta’lim sifatini qat’iy nazorat qilishning shaffof va ta’sirchan mexanizmini joriy etish» maqsadida ishlab chiqilgan.
Nizomga ko‘ra, reyting baholash quyidagi ko‘rsatkichlar asosida amalga oshiriladi:
- ta’lim tashkilotlari bitiruvchilarining haydovchilik guvohnomasini olish uchun nazariy va amaliy imtihon natijalari;
- ta’lim tashkilotlari bitiruvchilarining haydovchilik guvohnomasiga ega bo‘lgandan keyin yil yakunigacha yo‘l harakati qoidalariga amal qilmaslik hollaridagi jarima ballari;
- yil yakunigacha qonuniy kuchga kirgan sud qaroriga asosan ta’lim tashkilotlari bitiruvchilari aybi bilan sodir etilgan yo‘l-transport hodisalari soni;
- ta’lim tashkilotlarida to‘liq shtatda faoliyat yuritadigan oliy ma’lumotga yoki ilmiy darajaga ega o‘qituvchilarning soni to‘g‘risida ma’lumotlar.
Ta’lim tashkilotlari reytingini baholash ko‘rsatkichlar asosida Yo‘l harakati xavfsizligi xizmati amalga oshiriladi.
Ta’lim tashkilotlari reytingi quyidagicha toifalarga ajratiladi:
- 81 balldan 100 ballgacha — «yashil»;
- 51 balldan 80 ballgacha — «sariq»;
- 50 balldan past — «qizil».
Reyting ball ko‘rsatkichlari respublika bo‘yicha yagona shaklda yuritiladi hamda yil yakunlari bo‘yicha Qoraqalpog‘iston Respublikasi, viloyatlar va Toshkent shahri bo‘yicha alohida hisoblab chiqiladi.
Reyting natijalari har yili 25 yanvarda OAV va ijtimoiy tarmoqlarda e’lon qilinadi.
IIV reyting natijalari bo‘yicha faoliyat samaradorligi darajasi «yashil» deb topilgan ta’lim tashkilotlarining ijobiy ish tajribasi OAV hamda ijtimoiy tarmoqlarda keng yoritib boriladi.
Reyting natijalariga ko‘ra «yashil», «sariq» va «qizil» toifalarga kiruvchi ta’lim tashkilotlariga logotip beriladi va ushbu logotip ta’lim tashkilotining old kirish qismiga hamda [o‘rgatuvchi] avtotransport vositalarining old/orqa oynasiga majburiy o‘rnatiladi.
Nizom 2022 yil 1 sentabrdan e’tiboran kuchga kiradi.
