Turizm va sport vazirligi huzuridagi Madaniy meros agentligi direktorining birinchi o‘rinbosari etib Tursunali Karimdjonovich Kuziyev tayinlandi.

5 noyabrdan beri Tursunali Kuziyev Madaniy meros agentligi direktori vazifasini bajaruvchisi lavozimida ishlab kelayotgan edi. 16 dekabr kuni Shaxriyor Nurulloyev agentlik direktori bo‘ldi.

Tursunali Kuziyev o‘zbek davlat va jamoat arbobi, rassom, fotograf, O‘zbekiston Respublikasida xizmat ko‘rsatgan san’at arbobi, professor.

U 1951 yil 18 noyabrda Surxondaryo viloyati Jarqo‘rg‘on tumanida tug‘ilgan. 1976 yil Benkov nomidagi Respublika badiiy bilim yurtini, 1982 yil Toshkent san’at institutini tamomlagan.

Mehnat faoliyati davomida Surxondaryo viloyati Jarqo‘rg‘on shahar bosh rassomi, viloyat madaniyat fondi raisi, Benkov nomidagi Respublika badiiy bilim yurti direktori lavozimlarida ishlagan.

1995 yildan keyin O‘zbekiston prezidenti devoni konsultanti, madaniyat ishlari vazirining birinchi o‘rinbosari, O‘zbekiston badiiy akademiyasi raisi sifatida ishlagan.

2011−2013 yillar mobaynida madaniyat va sport ishlari vaziri sifatida faoliyat yuritgan.

2013−2016 yillarda Davlat jahon tillari universiteti Xalqaro jurnalistika kafedrasi professori bo‘lgan.

Telegramdan foydalanasizmi? Muhim yangiliklarni o‘tkazib yubormaslik uchun kanalimizga a’zo bo‘ling.

Madaniy meros rahbarligiga tayinlanishdan oldin esa Islom Karimov nomidagi ilmiy-ma’rifiy yodgorlik majmuasi rahbarining o‘rinbosari lavozimida ishlagan.