Дубай оилавий дам олиш учун ҳақли равишда энг яхши йўналишлардан бири ҳисобланади. Бу ерга тўғридан-тўғри қулай рейс йўлга қўйилган. Амирликдаги ҳордиқ турлари ва кўнгилочар ўйинлар шу даражада турли-туманки, бир таътил давомида ҳаммасини кўриб чиқишнинг иложи йўқ. Келажакка саёҳат дейсизми ёки тезюрар йўлда сайр қилишми, буларнинг ҳеч бири фантастика эмас, бу — Дубай. Дубайнинг Иқтисодиёт ва туризм департаменти меҳмонларни хайратда колдирувчи бориб кўришга арзигулик манзиллар ҳақида маълумот беради.
Келажак музейи
Ота-оналар архитектор Шон Килла лойиҳаси бўйича қурилган ғаройиб Келажак музейи фасадидаги нақшларни кўздан кечираётган бир пайтда оиланинг кичик аъзолари ичкарига кириб, роботлар билан учрашишни интиқиб кутишади: музейда ёқимтой робот ит «яшайди», шифт остида эса учувчи дельфинни кўриш мумкин. Заллар бўйлаб экскурсия вақт машинасини эслатади, у меҳмонларни 2071 йилга олиб ўтади. Бу ерда кўчаларда ғаройиб дизайнли автомобиллар юради, фазони тадқиқ қилиш ишлари эса янги даражага кўтарилган. Болалар учун махсус Future Heroes зонаси мавжуд бўлиб, бу ерда улар ўйнашлари, ўз истеъдодларини намоён этишлари ва янги кўникмаларга эга бўлишлари мумкин.
Atlantis Aquaventure аквапарки, The Palm
Агар оилангиз сув аттракционларини яхши кўрса, дунёдаги энг катта аквапарклардан бири Atlantis Aquaventure эътиборингизни тортиши аниқ. Ундаги аттракционлар турли ёшдаги меҳмонларга мўлжалланган: кичкинтойлардан тортиб, катталаргача. Аквапарк ҳудудида узунлиги 2 км келадиган дарё бор, унда кемада сунъий оқимларни енгиб сузиб ўтиш ва бир вақтнинг ўзида бутун аквапарк ҳудудини томоша қилиш мумкин. Юқоридан туриб томоша қилишни ёқтирганлар учунаквапарк устидан зип-лайн ўтказилган. Шунингдек, бу ерда денгизга чиқадиган ўз пляжи ва бутун оила учун турли-туман таомлар танловига эга фудкорт бор.
AYA Universe
AYA Universe — фазога чиқиш таассуротларини берадиган янги кўнгилочар бино. Бу ерга кирган киши бошқа сайёрага тушиб қолгандай бўлади: рангли дарё ва пастдан юқорига қараб оқувчи шаршара. Манзара «Аватар» фильмини эсталади, ҳатто машҳур Эйва дарахти ҳам бор. Атрофдаги кўп сонли кўзгулар ва нур иллюзиялари бошингизни айлантиради, баъзида том маънода. Меҳмонлар ўзлари билан бирга ёрқин таассуротлар ва ранг-баранг фотосуратларни олиб кетишлари мумкин.
Green Planet
Green Planet — бу ҳайвонларни яхши кўрадиганлар учун тўрт қаватли бино. Марказида 25 метрли дарахт мавжуд, унда қушлар уя қурган. Улар зообоғ бўйлаб эркин учиб юради ва ҳатто бирор меҳмоннинг елкасига қўниб олиши ҳам мумкин. Қанотлилардан ташқари, бу ерда лемурлар, маймунлар, игуаналар ва бошқа ҳайвонлар ҳам яшайди. Террариумда илонлар ва калтакесакларни кузатиш таклиф қилинади. Ҳар куни соат 13:00 да сув сепилади, шу боис бемалол ёмғир остида сайр қилиш имконияти ҳам мавжуд. Болалар учун мунтазам равишда билимларни оширадиган маърузалар ва маҳорат дарслари ўтказилади, катталар учун эса — йога ва медитация машғулотлари.
Дубай аквариуми
Dubai Mall мажмуасида дунёдаги энг катта аквариумлардан бири жойлашган. У 10 млн литр сувга мўлжалланган бўлиб, ҳатто Гиннеснинг рекордлар китобига ҳам киритилган. Аквариум остида ташриф буюрувчилар учун шиша туннель ўтказилган. Улар бу ердан минглаб денгиз жониворларини, хусусан, денгиз отлари, пираньялар, муреналар ва, албатта, акулаларни кузатишлари мумкин.
Dubai Parks and Resorts
Dubai Parks and Resorts учта тематик парк ва аквапаркни бир ҳудудда бирлаштиради. Legoland ўйинчоқлар шаҳри бўйлаб ғаройиб машиналарда сайр қилиш ва Бирлашган Араб Амирликларининг легодан йиғилган диққатга сазовор жойларининг нусхаларини томоша қилиш мумкин. Бундан ташқари, болаларга уларнинг севимли конструктор ўйинчоғининг деталлари қандай ишлаб чиқарилиши намойиш этилади.
Motiongate — кино ихлосмандлари учун жаннат. Ушбу боғ DreamWorks Animation, Columbia Pictures ва Lionsgate каби Голливуд студияларининг фильмларига бағишланган. Бу ерда тасвирга олиш майдончаларини ичкаридан томоша қилиш, аждарни қўлга ўргатиш ва Смурфлар қишлоғида бўлиш мумкин. Сўнгра 2−12 ёшли болалари бор оилаларга мўлжалланган Legoland Water Park аквапаркида сув горкаларида учишга йўл олса бўлади.
Яқинда Dubai Parks and Resorts`да футбол парки Real Madrid World очилди. У сайёҳларга 40 дан ортиқ ноодатий аттракционлар, қизиқарли ўйин-кулгилар, испан футбол клубининг ғалабаларига бағишланган ёғочли оригинал америка горкаси, шунингдек, футбол клубининг қадрли жойлари — Мадриддаги кийиниш хонаси ва «Сантьяго Бернабеу» футбол майдонига кириш имкониятини тақдим этади.
IMG Worlds of Adventure
Мавзули IMG Worlds of Adventure кўнгилочар боғини фильмлар ва мультфильмларни ёқтирувчилар муносиб баҳолаши шубҳасиз. Бу ерда экстремаллик даражаси турлича бўлган аттракционлар франшизаларнинг машҳур қаҳрамонларига, жумладан, Marvel олами персонажларига бағишланган. Боғ майдони 28 та футбол стадионини сиғдиради, бу ерда ҳақиқатдан ҳам сайр қилишга жой етарли.
Саҳро бўйлаб сафари
Саҳро ҳақиқатдан ҳам Дубайнинг ташриф қоғози, шу боис осмонўпар бинолар ёғдусидан завқланиб бўлгандан сўнг, қумтепаликлар оралаб сайр қилишнинг айни вақти. Бу билан эрта тонгда, ҳали жазирама иссиқ бошланмасидан олдин ёки ботаётган қуёш фонида чиройли фотосуратларни олиш учун кечга яқин шуғулланиш мумкин. Юрганида ғилдираклари остидан қум отилиб чиқадиган бақувват жип машиналаридан ташқари, сизда саҳро кемалари ҳисобланган туяларда сайр қилиш, сўнгра бадавийлар услубида нонушта қилиш ёки кечки овқат тановул қилиш имконияти бўлади.
Қоронғи тушганидан кейин эса бош узра қоронғу осмонда чақнаб турган юлдузларни кўриш учун осмонга қарасангиз бас. Platinum Heritage компанияси ҳар қандай дидга мос келадиган турларнинг катта танловини таклиф қилади.
Global Village
Global Village — бу мусиқа тинглаш, қизиқарли дунё таомларини татиб кўриш, шопинг қилиш, эсдалик совғалар харид қилиш, лазер шоусини томоша қилиш, чархпалакда ёки бошқа аттракционларда учиш мумкин бўлган кўнгилочар мажмуа. Global Village ҳудудидан сунъий дарё оқиб ўтади, унда кемачаларда сайр қилиш мумкин. Байрам кунларида эса Global қишлоғида доим ранг-баранг фейерверклар уюштирилади.
Dubai Miracle Garden
Dubai Miracle Garden дунёдаги энг чиройли боғлардан бири, десак муболаға бўлмайди. 7 гектар майдонни гуллардан ясалган ҳайкаллар безаб туради, уларни яратиш учун 150 миллионта ўсимликдан фойдаланилган. Инсталляциялар шаклларининг турли-туманлиги ва ёрқин ранглари билан кишини ҳайратга солади. Бу ерда ҳатто Emirates авиакомпаниясининг гуллардан яратилган икки қаватли А380 самолёти, вақтни тўғри кўрсатадиган гулсоат ва фотосессиялар учун кунгабоқарлар даласи ҳам бор.
Bounce Dubai
Bounce Dubai батутли боғида болалар ва катталар учун юздан ортиқ батутлар ўзаро боғланган. Сакраб бўлиб, баскетбол ўйнаш ва ҳатто девор бўйлаб сайр қилиш мумкин. Бутун оила учун ажойиб машғулот. Батутли боғдан сўнг нафақат яхши кайфият, балки чуқур соғлом уйқу ҳам кафолатланади.
Сайт: visitdubai.com
Реклама хуқуқлари асосида.
