29 март куни соат 10:00 дан Labo автомобилларининг 18 минг дона ҳажми учун онлайн контрактация очилади, дея хабар бермоқда UzAuto Motors компанияси матбуот хизмати.
Қайд этилишича, компания бозорда ортиб бораётган талабни инобатга олган ҳолда 2024 йилнинг 2-ярми учун автомобиллар ишлаб чиқариш ҳажмини оширган. Бунга сабаб сифатида кўрилган чора-тадбирлар, шунингдек, бундан олдинги контрактацияда харидорлар томонидан тўловларнинг ўз вақтида амалга оширилмагани кўрсатилган.
UzAuto Motors автомобиллар нархи ўзгаришсиз қолишини алоҳида таъкидлади.
Эслатиб ўтамиз, компания 2023 йилнинг декабрь охирида 2024 йилда ишлаб чиқарилиши режалаштирилаётган Cobalt, Damas ва Labo автомобиллари учун шартномаларни тузиб бўлинганини билдирганди. Оммабоп автомобиллар контрактацияси даврида жами 171,2 мингдан ортиқ шартнома берилган.
Аввалроқ компания мазкур автомобиллари нархини 3,5−6,7 фоиз оралиғида ошириш бўйича хабар эълон қилди. Компания, шунингдек, босқичма-босқич дилерларга кейинчалик сотиш учун автомобиль сотиб олиш имконини берадиган «ривожланган мамлакатларда қабул қилинган сотув тизими»ни жорий қилишини қайд этди.
Бироз ўтиб, нархларини ошириш бўйича якуний қарор ҳали қабул қилинмаганини таъкидлади. «Контрактация жараёни олиб борилмаётганини инобатга олиб, chevrolet.uz сайтидаги нархлар 2024 йилнинг 4-чораги учун прогноз кўрсаткичлари асосида ҳисоблаб чиқилган», — дейилади хабарда.
