UzAuto Motors компанияси Damas, Labo ва Cobalt нархларни ошириш бўйича якуний қарор ҳали қабул қилинмаганини қайд этди.
Компания ўзининг аввалги хабаридан асосий мақсад мижозларга хизмат кўрсатиш сифатини оширишни назарда тутувчи дилерлар билан ўзаро ҳамкорликнинг янги тизимига ўтганлигини эълон қилиш эканини таъкидлаган.
«Ҳозирда контрактация жараёнлари олиб борилмаётганлигини инобатга олган ҳолда, chevrolet.uz сайтида кўрсатилган нархлар 2024 йилнинг 4-чораги учун прогноз кўрсаткичлари асосида ҳисоблаб чиқилган», — дейилади хабарда.
Аввалроқ chevrolet.uz савдо сайтида 4 та бюджет Chevrolet моделларининг нархлари янгиланганди ва автомобиллар нархи ошганини UzAuto Motors матбуот хизмати «Газета.uz»га тасдиқлаганди. Шундан сўнг ижтимоий тармоқ фойдаланувчилари компания нархларни оширишдан олдин истеъмолчиларни огоҳлантириши кераклигини, контрактация ёпиқ пайтда нархларни янгилашдан мақсад нима экани тушунарсизлиги ҳақида ёза бошлади.
Сhevrolet.uz сайтида автомобиллар учун янгиланган нархлар қуйидагича кўрсатилган:
- Cobalt GS-Style Plus MT — 133 598 000 сўм (илгари 124 264 000 сўм эди);
- Cobalt GX-Style Plus AT — 156 589 000 сўм (146 757 000 сўм).
- Damas D2 DLX Style Plus — 100 325 000 сўм (96 932 000).
UzAuto Motors` бундан олдинги хабарида компания бозорда талаб ортиб бораётганига ҳисобга олган ҳолда Damas, Labo ва Chevrolet Cobalt автомобилларини ишлаб чиқариш ҳажмини қўшимча равишда ошириш масаласини ишлаб чиққани айтилади.
«Бундан ташқари, олдинги шартнома пайтида кечиктирилган тўлов 2024 йилда ишлаб чиқарилган автомобилларнинг бир қисмини чиқаришга олиб келди, бу эса компанияга қўшимча автомобилларни таклиф қилиш имконини беради», — дейилади хабарда.
Автомобиль ишлаб чиқарувчининг маълум қилишича, контрактация учун очиладиган қўшимча ҳажм 2024 йилнинг иккинчи ярмида ишлаб чиқарилади ва буни ҳисобга олган ҳолда Damas, Labo и Cobalt автомобилларининг нархи 3,5−6,7 фоизгача бўлган оралиқда ошади.
Шунингдек, UzAuto Motors халқаро стандартларга мувофиқ ривожланган мамлакатларда қабул қилинган автомобилларни сотиш тизимини босқичма-босқич жорий этишини маълум қилди.
«Ушбу тизимга кўра, дилерликларга кейинчалик сотиш учун автомобилларни харид қилиш имконияти берилади. Шу билан бирга, дилерликларга автомобиль учун тавсия этилган чакана қиймат белгиланади. Ушбу ёндашув нафақат дилерлик марказлари ўртасидаги рақобатни кучайтиради, балки хизмат кўрсатиш сифатини яхшилайди. Дилерлик марказлари хизмат кўрсатиш сифати ва инновацион хизматларни яхшилаш орқали қўшимча опциялар ва аксессуарларни таклиф қилиш имкониятига эга бўлишади», — дея қайд этган автомобиль ишлаб чиқарувчиси.
2023 йилнинг октябрь ойида UzAuto Motors ўз моделлари нархини ўртача 5,1 фоизга оширганди, кейин эса декабрь ойида яна бир нарх ошиши кузатилганди.
