3 апрель куни президент Шавкат Мирзиёев иштирокидаги халқ депутатлари Тошкент шаҳри кенгашининг навбатдан ташқари сессиясида Шавкат Буронович Умурзоқов Тошкент шаҳри ҳокими этиб тасдиқланди, дея хабар бермоқда пойтахт ҳокимлиги матбуот хизмати.
«Ўтган давр мобайнида у „Ўзбекистон-2030“ стратегиясида ўз ифодасини топган, Тошкент шаҳри аҳолиси ва меҳмонларининг қулайлиги ва хавфсизлигини таъминлаш, инвестицион бизнес-муҳитни яхшилаш, ва экологик барқарорликка эришишга қаратилган мақсадлар сари собитқадамлик билан бораётган, қатиққўл ва адолатли раҳбар эканлигини намоён қилди», — дея қайд этди ҳокимлик ўз хабарида.
Шавкат Умурзоқов бундан бир йил аввал — 2023 йилнинг мартида пойтахт ҳокими вазифасини бажарувчи этиб тайинланганди. Бунга қадар У 2018 йилнинг июнь ойидан буён «Ўзавтосаноат» акциядорлик жамияти бошқаруви раиси лавозимида ишлаган.
Шунингдек, у 2013−2018 йилларда Бош прокуратуранинг Уюшган жиноятчилик ва коррупцияга қарши курашиш департаментига, 2011 йил июнь ойидан 2013 йил сентябрига қадар эса Тошкент вилояти прокуратурасининг иқтисодий жиноятларга ва коррупцияга қарши курашиш департаментига раҳбарлик қилган.
