Техник жиҳатдан тартибга солиш агентлиги ҳукуматнинг мувофиқлик сертификати бошқа шахс номига расмийлаштирилган ҳолда олиб кирилаётган автомобилни божхона расмийлаштирувидан ўтказишни тақиқлаш режасига изоҳ берди.
Ўтган йилнинг декабрь ойи охирида ҳукумат автомобиллар, жумладан, электромобилларни олиб кириш қоидаларини қатъийлаштириш режасини муҳокама қилаётгани хабар қилинганди. Хусусан, 2024 йилдан бошлаб жисмоний шахсларга тижорат мақсадларида автомобиль импорти тақиқланиши ва янги хорижий автомобилларни фақат расмий дилерлар орқали сотиш тартибига қайтиш режа қилинган. Агентликнинг Kun.uz`га маълум қилишича, танқидлардан кейин тўхтатилган лойиҳа ҳозир яна кун тартибига қайтган.
Эслатиб ўтамиз, агентлик раҳбари бош вазир Абдулла Ариповга йўллаган мактубида мазкур лойиҳа вазирлик ва идоралар билан келишилгани ва жамоатчилик муҳокамаси учун жойлаштиришга тайёрланганини билдирган. Бироқ, тартибга солиш таъсирини баҳолашдаги муаммо, унинг сабаблари ва вужудга келадиган салбий оқибатлар етарлича ёритилмагани ҳамда жамоатчилик муҳокамасига қўйилиши аҳоли ва тадбиркорларнинг эътирозларига сабаб бўлиши мумкинлигини инобатга олиб Президент администрацияси ва Вазирлар Маҳкамаси томонидан рад этилган. Шу сабабдан ҳужжат лойиҳаси Адлия вазирлигига экспертиза учун киритилмаган.
Агентликнинг қайд этишича, автомобиль импортёрлари транспорт воситаси турини маъқуллаш ҳужжатини расмийлаштириш жараёнидан қочиб, бир турдаги транспорт воситасининг ҳар бирини бошқа жисмоний шахслар номига ўтказган ҳолда муомалага чиқариб, ички бозорда сотиб келяпти.
Таклиф этилаётган ўзгариш кучга кирса, божхонада автомобилларни бошқа шахс номига ўтказиш тақиқланади. Натижада хориждан Ўзбекистонга транспорт воситаларини фақат юридик шахслар олиб кира оладиган бўлади. Олиб киришдан олдин эса автомобилнинг турини маъқуллаш талаб этилади. Бунинг учун автомобилнинг Ўзбекистон шароитига мослиги текширилади, дея маълум қилди Техник жиҳатдан тартибга солиш агентлиги.
Автомобиллар импортига юқорида айтиб ўтилган тартибни аввалига 1 апрелдан бошлаб жорий этиш режалаштирилган, лекин айни пайтда бу борадаги ҳужжат лойиҳа ҳолатида экани айтилди.
«Бутун дунёда шу тартиб ишлайди. Бизда ҳам шу нарса бор, фақат ишламаётган эди, чунки божхона ҳудудида машиналар бировнинг номига расмийлаштириб олиб чиқиб кетилади. Вазирлар Маҳкамаси томонидан 2017 йилда «Муомалага чиқарилаётган ғилдиракли транспорт воситаларининг хавфсизлиги тўғрисида»ги 237-сонли умумий регламент тасдиқланган. Энди ўша регламент асосида мувофиқлик сертификатини олиш талаб этилади. Бу билан Ўзбекистонни хавфсиз машиналар билан таъминлаш ва техник регламентларга амал қилинишига эришиш кўзланяпти», — дейилади агентликнинг Kun.uz келтирган хабарида.
Агентликка кўра, 202З йилда 62 748 та транспорт воситасига 61 372 та мувофиқлик сертификати расмийлаштирилган бўлиб, бу сертификатларнинг 60 451 таси жисмоний шахслар номига берилган.
Техник жиҳатдан тартибга солиш агентлигининг билдиришича, етказиб берилаётган автотранспорт воситаларига сотувдан кейинги хизмат кўрсатиш, кафолат муддати доирасида бепул сервис тақдим этиш, эҳтиёт қисмлари билан узлуксиз таъминлаш масалалари очиқ қолишига сабаб бўлмоқда.
