Petroleum Technology Group Ўзбекистонда 78 та АЁҚШга эга бўлган UNG Petro компаниясининг янги эгасига айланди, буни Корхона ва ташкилотларнинг ягона давлат регистридаги маълумотлардан билиш мумкин.
Илгари ёқилғи қуйиш шохобчаларининг эгаси «Ўзбекнефтгаз» компанияси бўлган. 2023 йилнинг май ойи охирида Давлат активларини бошқариш агентлиги UNG Petro (устав капитали — 265 млрд сўм)ни сотиш бўйича консультант танлаш бошланганини эълон қилган, бироқ ҳозирча таклифларни қабул қилиш бошлангани ва хусусийлаштириш бўйича якуний натижалар эълон қилинмаган.
Petroleum Technology Group қачон ва қанча пулга UNG Petro сотиб олгани ҳақида хабар берилмаган.
Petroleum Technology Group 2023 йил 4 октябрда ташкил этилган бўлиб, тижорат ва бошқарув масалалари бўйича консалтинг компанияси ҳисобланади. Унинг таъсисчилари Delta Global Dynamics компанияси (1 фоиз) ва Данияр Абдулазизович Камилов (99 фоиз) — собиқ ташқи ишлар вазири, ҳозирда президент ҳузуридаги Хавфсизлик кенгаши котиби ўринбосари Абдулазиз Камиловнинг ўғли. Данияр Камилов Delta Global Dynamics`нинг ҳам 100 фоиз улушига эгалик қилади.
2022 йил февраль ойида Данияр Камиловнинг компанияларидан бири First Premium Allianc Ўзбекистондаги энг йирик алкоголь заводини сотиб олган. Тадбиркор шунингдек, Progressgortech-Asia (Ўзбекистон аэропортларига авиакеросин етказиб берувчиларга хизмат кўрсатади, Ўзбекистоннинг 9 та аэропортида ишлайди) ва Metropol Group (тижорат ва бошқарув фаолияти бўйича консультация бериш) компанияларига эгалик қилади.
Metropol Group 2021 йил июнь ойида Тошкент марказидаги Миллий хавфсизлик хизматининг собиқ биносини 210 млрд сўмга хусусийлаштирганди. Унинг ўрнида премиум классдаги Radisson меҳмонхонаси қурилиши режалаштирилган.
