Акмал Жуманазаров Ўзбекистон техник жиҳатдан тартибга солиш агентлиги директори лавозимига тайинланди. Бу ҳақдаги қарорни Шавкат Мирзиёев имзолади, деб хабар бермоқда давлат раҳбари матбуот котиби Шерзод Асадов.
Тайинлов муносабати билан Акмал Жуманазаров энергетика вазирининг ўринбосари лавозимидан озод этилди.
Эслатиб ўтамиз, у 2023 йилнинг февраль ойида президент қарори билан энергетика вазирининг электр энергетикаси ва кўмир саноати масалалари бўйича ўринбосари лавозимига тайинланганди.
Унга қадар Вазирлар Маҳкамаси Геология, энергетика, саноат ва унинг базавий тармоқларини ривожлантириш масалалари департаментининг бошлиғи лавозимида фаолият юритиб келган.
Техник жиҳатдан тартибга солиш агентлигининг собиқ раҳбари Дилшод Саттаров (бу лавозимда 2018 йил август ойидан бери ишлаб келаётганди) январь ойида бўлиб ўтган йиғилишда президент томонидан лавозимидан озод этилган эди. Шавкат Мирзиёев ўшанда Ўзбекистон сертификатларини тан олиш бўйича ҳали бирор давлат билан келишувга эришилмаганини таъкидлаган.
