Шавкат Мирзиёев Андижон вилоятидаги Андижон саноат хабига ташрифи чоғида электробусларни йиғиш лойиҳаси билан танишди.
Лойиҳа Хитойнинг Lanzhou Guangtong New Energy Automobile компанияси билан биргаликда ишга туширилади. Андижон вилояти ҳокими Шуҳрат Абдураҳмонов январь ойи бошида мазкур компания билан 100 миллион долларлик меморандум имзолаганди. Заводнинг лойиҳа қуввати йилига 2000 та электробус ишлаб чиқариши кутилмоқда.
Хитой томони президентдан лойиҳа номини ва «Андижондан Европага экспорт қилишни бошлаш» учун чиқариладиган электробусга ном беришни сўради.
«Бунинг номини „Ипак йўли“ автобуслари деб номлаймиз. Агар бу номни қўйсак, бутун регионимизга ҳам маъқул бўлади. Андижонда бундай катта лойиҳага келишяпмиз, [унинг] натижаси бўлади. Си Цзиньпин жаноблари билан тарихимиз ва бугунги кунимиз тўғрисида катта фильм қилишга келишганмиз. Шу фильмнинг ичига „Ипак йўли“ лойиҳасини ҳам киритамиз», — деди Шавкат Мирзиёев.
100 миллион долларлик лойиҳа доирасида худди шу компания билан электроскутерлар ишлаб чиқаришни йўлга қўйиш режалаштирилган.
Эслатиб ўтамиз, Хитойнинг Dongfeng Special Car Company компанияси ҳам Фарғона вилоятида электробуслар ишлаб чиқариш лойиҳасини амалга оширмоқчи. Лойиҳанинг қиймати 100 миллион долларга баҳоланмоқда. Вилоятда фотоэлектростанциялар ва бошқа саноат корхоналарини қуриш режалаштирилган.
Аввалроқ президент BYD компаниясининг Ўзбекистонда электробуслар йиғишни бошлаш режасини ҳам қўллаб-қувватлаганди. Ушбу корхона Тошкент шаҳрида жойлашиши кутилмоқда.
