Ижтимоий тармоқларда Қашқадарё вилоятидан ўтган Муборак — Помуқ — Аланг — Нишон автомобиль йўлининг 17 километридаги кўприк қулаб тушгани айтилган видео тарқалди. Муборак тумани ҳокимлиги ҳолат юзасидан муносабат билдирди.
Қайд этилишича, узунлиги 12 м бўлган кўприк 1982 йилда зовур устида қурилган. У оғир юк ташувчи автотранспорт воситаларининг мунтазам ҳаракатланиши сабаб носоз ҳолатга келиб қолган.
Ҳокимликка кўра, ҳозирда кўприкдан ҳаракатланиш тўлиқ чекланган, ахборот берувчи йўл белгилари ўрнатилган ва автотранспорт ҳаракати учун вақтинчалик айланма йўл ташкил қилинган.
Бироқ 2024 йил 16 февраль куни оғир автотранспорт воситаси айланма йўлдан ҳаракатланмасдан, авария ҳолатида бўлган мазкур кўприкдан ҳаракатланиши оқибатида кўприкнинг темир-бетон плиталари синган ва қулаб тушган. Содир бўлган ҳодиса оқибатида салбий ҳолат кузатилмаган.
Кўприк 2024 йилда қайта қурилиши белгиланган бўлиб, йилнинг 2-чорагида тўлиқ қайта фойдаланишга топширилиши режалаштирилмоқда, дейилади хабарда.
