Шавкат Мирзиёев Беларусь раҳбари Александр Лукашенко билан музокаралар чоғида Ўзбекистонда БелАЗ автомобилларини биргаликда ишлаб чиқаришни таклиф қилди. Беларусь президентининг матбуот хизмати икки раҳбарнинг сўзларини эълон қилди.
БелАЗлар — Беларусь автомобиль заводида ишлаб чиқариладиган кон самосваллари, конларда ишлаш учун ускуналар, ер ости ишлари учун машиналар, бульдозерлар, юк кўтарувчи ва аэродромда юк ташувчи техникалар.
«Биз очиқмиз. Ҳамма давлатлар билан ҳам бундай ишончли, самимий суҳбат қилмаймиз. Биз икки соатдан кўпроқ суҳбатлашдик (тор доирада) — ҳамма нарса ҳақида гаплашдик. Лекин биласизми, кўп нарса сизларга боғлиқ», — деди Шавкат Мирзиёев делегациялар аъзоларига мурожаат қилиб.
«Ҳозир бизни ҳеч нарса тўхтата олмайди. Биз тоғ-металлургия саноатини кенгайтиришга жиддий ёндашяпмиз. Бизга БелАЗ керак. Бу ерга аллақачон маҳаллийлаштириш керак, қўшма корхона керак. Биз мисни бойитиш фабрикалари қурамиз — учинчисини, тўртинчисини, бешинчисини. 800 минг тонна мисни қайта ишлаймиз. Бизга экспорт қилиш учун қанча машина керак? Кўп йиллар давомида муҳандисларимиз ва ўрта даражадаги ходимларимизни БелАЗ юк машиналарида ишлашга ўргатдик. Нега энди ушбу БелАЗларни биргаликда ишлаб чиқара қолмаймиз?» — сўради Шавкат Мирзиёев.
Александр Лукашенко бунга жавобан келаётган йил Беларусда Сифат йили деб эълон қилинганини айтди. «Бу фақат бир йиллик эмас, узоқ муддатли», — дея таъкидлади у.
«Энди биз сифатни янада кучайтирмоқчимиз. Нега — чунки одамлар беларусча сифатни хоҳлайди, — деди Александр Лукашенко. — Россияда ҳам одамлар Беларусь техникаларига ўрганиб қолган — бу олдин умумий, СССРники эди. Энди биз уни муносиб даражага олиб чиқдик. Биз сифатни яхшилаймиз. Шундай экан, шуни ёдда тутингки, техникаларимиз янада сифатли бўлади».
Шу билан бирга, унинг сўзларига кўра, Беларусь нафақат техникаларни етказиб беришга, балки уларга хизмат кўрсатиш учун маҳаллий сервис марказларини яратишга ҳам тайёр. Бундай тажриба узоқ вақт давомида тўпланиб келган.
«Бу ажойиб иш бўларди. Сервис бор экан, фермерларнинг муносабати ҳам бутунлай бошқача бўлади, — деди Шавкат Мирзиёев. — Биздаги ҳар 10 та трактордан 5 таси Беларусники».
«Хуллас, 10 тадан 7 таси Беларусники бўлиши керак», — қўшимча қилди Александр Лукашенко.
Президент ўз делегациясига ушбу масалаларни алоҳида назоратга олишни топширди.
Эслатиб ўтамиз, Олмалиқ кон-металлургия комбинати (ОКМК) таркибида 3-мисни бойитиш фабрикаси (3-МБФ) ташкил этиш режалаштирилган. Унда «Ёшлик-1» конидан олинган 5,12 миллиард долларлик маҳсулот қайта ишланиши кутилмоқда. Бу кон 11 минг гектар майдонни эгаллаган бўлиб, унда олтин, мис, кумуш, молибден, селен каби 13 турдаги қимматбаҳо ва нодир металлар мавжуд. Февраль ойи бошида ОКМК раҳбари Абдулло Хурсанов президент 3-МБФ қурилишини 1 июлдан кечиктирмай бошлаш, «инженеринг базавий лойиҳаси»ни эса 1 мартгача якунлаш ҳақида топшириқ берганини айтганди.
