2023 йилги давлат дастури лойиҳасида Тошкент вилоятида жойлашган Олмалиқ кон-металлургия комбинатининг «Ёшлик» мис конини ўзлаштиришнинг биринчи босқичини тугатиб, 3-мисни бойитиш фабрикасини ишга тушириш таклиф қилинмоқда. Режага кўра фабрика 60 млн тонна рудани қайта ишлаш қувватига эга бўлади.
Бунинг учун «Ёшлик» мис конини ўзлаштириш инвестиция лойиҳаси доирасида режалаштирилган «Ёшлик I» ва 3-мисни бойитиш фабрикаси учун асосий технологик ускуналарни қурилиш майдончасига етказилади. Мазкур вазифани август ойигача бажариш режа қилинган.
Шунингдек, сентябрь ойида рудани қайта ишлаш қуввати 60 млн тонна бўлган 3-мисни бойитиш фабрикасини қурилиш-монтаж ишлари якунланади ва 1-линия ишга тушиши мумкин.
Лойиҳада Олмалиқда мисни бойитиш фабрикаси ва Мис эритиш заводи лойиҳаларини бошлаш таклифи ҳам илгари сурилган. Режага кўра, март ойигача Олмалиқ КМК негизида рангли ва қимматбаҳо металларни ишлаб чиқаришни кенгайтириш ва ишга тушириш бўйича ҳукумат қарори лойиҳаси ишлаб чиқилади. Мис эритиш қувватларини кенгайтиришнинг асосий муҳандислик-лойиҳалаш (Basic Engineering) ишлари якунланади. Июнь ойигача комбинат «HATCH» консалтинг компанияси билан мис эритиш қувватларини кенгайтиришнинг дастлабки техник-иқтисодий асосланишини ишлаб чиқишни якунлайди.
Бундан ташқари, агар мазкур давлат дастури лойиҳаси тасдиқланса, июнь ойигача Навоийдаги Пистали конида 4 млн тонна олтин рудасини қайта ишлаш мажмуасининг қурилишини якунланиши мумкин. Бу вақт ичида кон ва «6-гидрометаллургия заводи» («6-ГМЗ») учун асосий тоғ-кон ва бойитиш технологик ускуналари сотиб олинади. Ташқи электр таъминоти қурилиши ишлари якунланади. Бунинг ортидан сентябргача кон ва 6-ГМЗ қурилиш ишларининг 1-босқичи якунланиши ва фойдаланишга топширилиши мумкин.
Мазкур лойиҳалар ҳисоб-китобларга кўра ташаббускорларнинг ўз маблағлари, тижорат банклари кредити, хорижий инвестициялар орқали молиялаштирилиши кутилмоқда.
Унинг ижросини Тоғ-кон саноати ва геология вазирлиги Б.Исламов, «Навоий КМК» АЖ, Ўзбекистон миллий электр тармоқлари АЖ, Инвестициялар, саноат ва савдо вазирлиги Л.Кудратов, Иқтисодиёт ва молия вазирлиги Шерзод Кудбиевлар амалга оширади. Ижро устидан назорат эса президент Администрациясига топширилган.
Эслатиб ўтамиз, 2023 йилги давлат дастури лойиҳаси муҳокамаси 17 февралга қадар давом этади. Унга regulation.gov.uz портали ёки Тараққиёт стратегияси сайти орқали таклиф қолдириш мумкин.
