Ўзбекистон президенти Шавкат Мирзиёев 2 февраль куни давлат органи шаклида «Таълим соҳасидаги лойиҳалар маркази» лойиҳа офисини ташкил этиш тўғрисидаги қарорни имзолади. Давлат раҳбари идора ташкил этилишини январ ойи охирида мактаб таълимини такомиллаштиришга бағишланган йиғилишда маълум қилганди.
Янги тузилмани яратишдан кўзланган мақсадлар қаторида таълим соҳасида кадрлар салоҳиятини ошириш ва таълим хизматлари сифатини халқаро стандартлар даражасига кўтариш, бу борадаги ислоҳотларни жадаллаштириш киради.
Ташкилот директори Президент администрацияси томонидан лавозимга тайинланади ва лавозимидан озод этилади. Унга мактабгача ва мактаб таълими вазирининг биринчи ўринбосари ҳамда Олий таълим, фан ва инновациялар вазирининг биринчи ўринбосарига берилган ваколатлар берилган.
Лойиҳа идораси ҳар ойда Президент администрациясига «таълим тизимини ислоҳ қилишнинг аҳволи, амалга оширилаётган чора-тадбирлар, ислоҳотларни амалга оширишга тўсқинлик қилаётган омиллар ва уларни бартараф этиш йўллари тўғрисида» маълумотларни тақдим этиб боради.
Мактабгача ва мактаб таълими, шунингдек, Олий таълим, фан ва инновациялар вазирликлари, улар ҳузуридаги ташкилотлар ва бошқа давлат органлари «лойиҳа офиси томонидан ишлаб чиқилган таклиф ва тавсияларнинг белгиланган муддатларда сифатли амалга оширилишини таъминлайди, дейилади ҳужжатда.
Таълим масалаларини тартибга солувчи меъёрий ҳужжатлар лойиҳалари энди лойиҳа офиси томонидан мажбурий тасдиқланиши керак.
Лойиҳа офисига 2024 йил учун қуйидаги вазифалар юкланган:
- педагог кадрларни тайёрлаш, қайта тайёрлаш ва малакасини ошириш тизимини таҳлил қилиш, педагог кадрларнинг билим ва қизиқишларига мос келадиган табақалаштирилган таълим дастурларини жорий этиш, жараёнга нодавлат ва халқаро ташкилотларни жалб этиш;
- профессор-ўқитувчиларни тайёрлайдиган университетларни тизимли ривожлантириш;
- касб-ҳунар таълимидан сўнг олий таълимни давом эттириш имкониятларини кенгайтириш, уч йиллик таълим дастурлари асосида амалий бакалаврлар тайёрлашни ташкил этиш;
- ўқувчилар ривожланишини психологик-педагогик диагностика қилишнинг замонавий усулларини жорий этиш, уларнинг қобилият ва майлларини аниқлаш, шунингдек, ёшларни касбга йўналтириш фаолиятини такомиллаштириш;
- таълим соҳасидаги давлат органларининг айрим функцияларини (таълим ташкилотлари рейтингини аниқлаш, таълим дастурларини аккредитация қилиш ва бошқалар) нодавлат, шу жумладан халқаро ташкилотларга аутсорсинг қилиш бўйича таклифлар тайёрлаш;
- таълим соҳасида хусусий сектор улушини ошириш учун зарур шарт-шароитларни яратиш, шу жумладан, уни молиявий қўллаб-қувватлашнинг самарали механизмларини жорий этиш.
Ўтган ҳафта президент қарори билан олий таълим, фан ва инновациялар вазири этиб Қўнғратбай Шарипов тайинланди. Шавкат Мирзиёевнинг сўзларига кўра, вазир зиммасига касб-ҳунар ва олий таълим тизимида туб ўзгаришлар киритиш вазифаси юкланган.
Бундан ташқари, мактабгача ва мактаб таълими вазирига иккита янги ўринбосарлар этиб Фарход Боқиев ва Сардор Раджабов тайинланди, бир кун аввал «улар мактабларда янги таълим, тарбия ва маънавият муҳитини яратиши зарур», деганди президент.
