Собиқ ҳоким ва тадбиркор Жаҳонгир Ортиқхўжаев «Лолазор» подкастида оммавий ахборот воситалари ва блогерлар ҳақидаги фикрларини билдирди.
Журналистлар ва блогерларнинг танқидини юрагига қанчалик яқин олиши ҳақидаги саволга жавоб берар экан, тадбиркор «менда иммунитет бўлмаганида, ўлиб қолиб бўлган бўлардим „уже“ бунча танқидлардан, унча-мунчаси кўтаролмайди», — деди.
Унга кўра, подкаст иштирокчилари — блогер ва ҳуқуқшунос Хушнуд Худойбердиев, молиячи Отабек Бакиров, журналист Муҳрим Аъзамхўжаев, журналист ва дизайнер Лазиз Ҳамидов обуначиларининг умумий сони 1−1,5 миллион кишидан ошмайди, бир актрисада эса 5 миллион киши бўлиши мумкин.
«Сиз 1 миллионлик овозингиз билан… ҳаммаёқни „решать“ қилиб ташлаётгандек, фақат жамоатчилик сизларнинг орқанглардан эргашаётгандек, сиз зўрсизлар, ҳамма сизларга эргашаётгандек. Гапимни кесиб ташламайсизми? Туюлади сизларга. Кейин анави ерда ёшларга айтасанки — ёш авлод, 30 яшар йигит — Хушнудни танийсанми? — Қайси Хушнуд? — Блогер-чи? — Танимайман. Сиз мана бу Муниса [Ризаева]ни (хонанда) танийсизми, дейди ёки Ҳамдам Собировни танийсизми, дейди. — Отабек Бакировни танийсизми? — Йўқ, нима қиламан мен уларни? „Сен жамоатчилик эмасмисан?“, — дейман мен. „Мен жамоатчиликман, улар билан нима ишим бор мени?“, — дейди», — деди собиқ ҳоким.
Тадбиркорнинг айтишича, «максимал 1,5 миллион обуначиси бўлган 5−6 нафар блогер» ўзини ҳақ деб ҳисоблайди ва жамоатчилик номидан гапиради.
«Агар Magic City сизнинг 10 та «подписчик»ингизга ёқмаётган бўлса, бутун Ўзбекистонга ёқмаётгандек қилиб кўрсатасизлар. Кечирасиз, ўша ерда «одновременно» турганларнинг (актёр ва қўшиқчиларни назарда тутаётган бўлиши мумкин — таҳр.) «подписчик»ини ҳисобласангиз, 50 миллион бордир… Кечирасизлар-ку, Хушнуд ака, охирги пайтларда бир хил блогерлар бор-ку, шунақа оёғи ердан узилди, ўзини, билмайман, ким деб ўйлаяпти, ҳамма нарсани ҳал қилиб ташлайман, деб ўйлаяпти», — деди у.
Жаҳонгир Ортиқхўжаев журналист ва блогерлардан «сал пастроққа тушишни» сўради.
«Сиз жамият эмассиз фақат. Жамоатчилик сизлардан иборат эмас. Сизлардан кўпроқ битта ликиллаганроқ қиз [машҳур]. Лекин фарқи бу: сиз бировни билмасдан туриб „информацияси“ орқали „подписка“ йиғяпсиз… У одам [ўша қиз] ўзини ярим яланғоч кўрсатиб. Кимнинг гуноҳи кўпроқ? Мен билмайман. Мисол учун, „информация“ тўғри бўлиши учун икки томондан нима [фикр — таҳр.] олиш керак… Сиз жамоат фикрини маълум миқдоргача ўзгартиришингиз мумкин, лекин бу [бутун] Ўзбекистон дегани эмас. Бироз пастга тушиш керак», — деди у.
Тадбиркор журналист ва блогерларни Тошкент марказини кезиб, бу ҳақдаги одамларнинг фикрини билишга таклиф қилди.
«Мен ўша Эски шаҳарга бориб, хоним ҳам олиб еёламан, сомса ҳам олиб еёламан ҳозир. Борсам, ҳурматимни ҳам қилишади. Анави куни нонга кирсам ўша жойга, пул олмайман дейди новвойлар «Чорсу»да. Хурсанд бўлдим, лекин бердим», — деди у.
Муассисларни алмаштириш ва ажратилган ерларни сотишда давлат рухсати зарурлиги муҳокама қилинар экан, Жаҳонгир Ортиқхўжаев эътироз билдирди ва давлат «сиз тасаввур қилганчалик назоратсиз эмаслигини» таъкидлади. Унга кўра, жазо муқаррарлигини таъминлайдиган назорат органлари мавжуд.
«„Ҳей, тўхтанглар, ўзи гап бошқа ёқда, сизлар эшитинглар“, дейишга ҳам „успеть“ қилмайди одам. Бирданига сизларда шунақа нарса бор… „ОПГ“ бор-ку — „организованная преступная группировка“ [уюшган жиноий гуруҳ — таҳр.]. Мен „ОПЖ“ дейман — „организованные преступные журналисты“ (уюшган жиноий журналистлар)… 16:47 да битта нарса чиқади сизда… Уни „перепечать“ қилиш учун камида 3,5 минут вақт керак, роса ҳаракат қилганман. 16:47 дақиқанинг 37 сониясида „пақиллатиб“ ҳаммангларда чиқади. Бу тасодифми? Тушуняпсизми?» — сўради у.
Собиқ ҳоким ҳар бир мутахассиснинг ўз услуби бўлиши керак, деб ҳисоблайди, «ундан олиб „перепечать“ қилиш тарбиясизлик ва ўзининг фикри йўқлигидан [далолат]».
«Кўп кузатганман: 16:47 [да пост чиқади], қараб турларинг дейман, мана буларда 37 секунддан кейин чиқади, дейман… „Организованные преступные журналисты“ дейман, ҳозир бошлайди, қараб тур, дейман. 16:47 да ҳамма босади. Мен кимлигини ҳам айтиб беришим мумкин. 12 тача бор, масалан, ўзинглар ҳам биласизлар. Мен бу тасодифми дейман ёки „давай, болалар, кнопкани босамиз, тайёрми? Ортиқхўжаевнинг шўрига шўрва тўкилибди, давай босамиз“. Тақ-тақ-тақ!» — деб, автоматдан отилган ўқ овозига тақлид қилди.
Тадбиркор журналистлар «уларни ҳурмат қилишлари» учун ўз маҳсулотларини хорижда ҳам ўтказа олиши кераклигини айтди.
«Мен маҳсулотимни экспорт қила олдим. Сиз ўз «статья»нгизни экспорт қила олдингизми? Сизни чет элда ўзбекдан бошқаси танийдими, ўқийдими?», — сўради у.
Отабек Бакиров иқтибос келтиришни экспорт деб аташ мумкинлигини тушунтирди, Хушнудбек Худойбердиев эса тил тўсиқлари борлигини қайд этди.
«Менда техника барьери бор эди, инженер барьери бор эди. Мен инженер олиб келдим, техника олиб келдим. Сизда ростдан ҳам шохингиз бўлса, одамингиз бўлиши керак, инглизчага „перевод“ қилиш керак, Bakirov Company бўладими, билмайман. Сиз маҳсулотингизни экспорт қила олмадингиз. Ҳеч ким сизларни эшитмайди. Сиз Тошкентда, 1,5 миллион обуначига эга даврадасизлар… Узр, мен эҳтиросларга берилиб кетган бўлсам. Сизлар ўйлайсизлар титратиб юборамиз ҳамма нарсани, деб. Балки қилоларсиз… Лекин сиз экспорт қила олмадингиз маҳсулотингизни. Шунинг учун мен айтмоқчиманки, сиз сифатсиз контентсиз чет элликлар учун» — дейди Жаҳонгир Ортиқхўжаев.
Тадбиркорнинг фикрича, Ўзбекистонга хорижий ОАВ кириб келса, маҳаллий журналист ва блогерлар рақобатга дош бера олмайди.
«Бу билмайман қайси [ОАВ бўлиши мумкин], бу менинг соҳам эмас. Агар соҳам медиа бўлганида бор-ку, мен сиз билан чой ичиб ўтирмасдим. Сизни сочиб ташлаган бўлардим. Тушунтиролдимми?» — деди у.
Ундан 2019 йилда ёпилган Togri.uz лойиҳаси билан алоқаси ҳақида сўрашди. «Менда унақа нарса бўлмаган. Мен шуғуллансам, энг зўрини қиламан. Агар менинг ишим „пресса“ бўлса, зўрини қилардим», — деди у.
Жаҳонгир Ортиқхўжаев, ўзининг сўзларига кўра, жиянига тегишли бўлган (аммо 2021 йилда каналнинг савдо белгиси собиқ ҳоким компаниясига тегишли эди) Zo‘r TV телеканалини ОАВ деб ҳисобламайди.
«Zo‘r TV`ни сизнинг контентингиз билан боғламанг. Сиз у ерда «группа»лардан кичкинасисиз… Zo‘r TV`да 10 миллион «просмотр» бор. Zo‘r TV «международный», чет эл кузатади, мисол учун. У менинг номимда ҳам эмас, жияним ўзи юргазади, ўша вақтда олган, «просто» менга боғлашади у нарсани… Агар мен шуғулланганимда, бошқа контент бўларди», — деди у.
Жаҳонгир Ортиқхўжаев бундан аввал сиёсатдан кетгани, Magic City боғини сотгани ҳақида гапирган эди.
