Шавкат Мирзиёев 29 январь куни бўлиб ўтган йиғилишда экология мавзусига, хусусан, ҳаво ифлосланишига тўхталиб ўтди, деб хабар бермоқда унинг матбуот котиби.
Давлат раҳбари ҳаво ифлосланишининг олдини олиш бўйича илмий асосланган таклиф ва ҳисоб-китоблар қилинмаётгани бўйича тегишли вазирлик ва идоралар фаолиятидаги қолоқликларни кўрсатиб ўтди.
Шунингдек, йиғилишда транспорт тизимини рақамлаштириш, йўл қурилиши ва эксплуатациясига хусусий секторни жалб қилиш, темирйўлда юк ташиш автомобилга нисбатан 3 баробар кўп вақт талаб қилаётгани санаб ўтилди.
Комплекс таркибига кирувчи вазир ва ҳокимларнинг режалари ва натижалари суст бўлган ўринбосарлари ишдан бўшатилиб, уларга аниқ KPI белгиланиши ва шундан кейин бир йил муддатга шартнома асосида ишга олиниши белгиланди.
Тошкент шаҳри ва Тошкент вилояти ҳокимларида қурилиш ва коммунал хўжалигига жавоб берадиган 1 нафар ўринбосар бўлиши қарор қилинди.
Январь ойи бошида Экология вазирлиги Тошкент шаҳрида ҳаво ифлосланишининг асосий омилларини санаб, вазиятни яхшилаш бўйича қатор чора-тадбирларни эълон қилганди. Яқинда Олий Мажлис Қонунчилик палатасида бўлиб ўтган муҳокамада атмосфера ҳавосининг ифлосланиши мавзуси экологик мавзудан ижтимоий аҳамиятга эга бўлган даражага кўтарилиб, мамлакатнинг барча аҳолиси хавфсизлиги ва саломатлиги билан боғлиқлиги таъкидланди.
Бир неча кун олдин Экология вазирлиги «Газета.uz»га Тошкент шаҳрида ҳаво сифатини яхшилаш бўйича кечиктириб бўлмайдиган чора-тадбирлар лойиҳаси ҳақида маълумот берганди. Иссиқхона ҳамда заводларда чанг-газ филтрларини ўрнатиш, Аи-80, ИЭСларда кўмир ҳамда мазутдан фойдаланишни тақиқлаш ва бошқалар шулар жумласидандир.
Маълумот учун, Ўзбекистонда ҳаво сифатига оид миллий стандартлар ишлаб чиқилмоқда. ЖССТ тавсияларига географик ва иқлимий хусусиятлар туфайли эришиш қийин, ҳеч бир мамлакатдаги кўрсаткичлар ЖССТ стандартига мувофиқ эмас, дея таъкидлаган Экология вазирлиги. Ҳаво билан боғлиқ касалликлар бўйича ҳам ўрганишлар бошланган.
