26 январь куни Ўзбекистоннинг Ҳиндистондаги янги фавқулодда ва мухтор элчиси Сардор Рустамбоев Деҳли шаҳрига борди, деб хабар бермоқда «Дунё» ахборот агентлиги.
Сардор Рустамбоев 1978 йилда туғилган. Бирмингем университети (Буюк Британия), Тошкент давлат шарқшунослик университети, Лондон университетининг (Буюк Британия) Шарқ ва Африка тадқиқотлари мактаби, Президент ҳузуридаги Давлат ва жамият қурилиши академиясини битирган. Сиёсий фанлар номзоди илмий даражасига эга.
У Ташқи ишлар вазирлиги тизимида 2000 йилдан буён қатор лавозимларда фаолият юритган. Шунингдек, Ўзбекистоннинг Буюк Британиядаги элчихонаси ва Шанхай ҳамкорлик ташкилоти котибиятида ишлаган. 2018−2023 йилларда Франциядаги элчихонасига раҳбарлик қилган.
У 2019 йилда «Юксалиш» умуммиллий ҳаракати томонидан ёш ва прогрессив раҳбарларнинг Топ-35 рўйхатига киритилганди.
Сардор Рустамбоев 2020—2023 йилларда Деҳлидаги элчихонага етакчилик қилган ва 2023 йил сентябрь ойида Ўзбекистоннинг Германиядаги элчиси этиб тайинланган Дилшод Аҳатов ўрнини эгаллади.
