Сенат раиси Танзила Нарбаева 25 декабрь куни ёшлар билан ўтказилган учрашувда интернетда тарқалган, Ўзбекистон мустақиллиги билан боғлиқ баёнотлар бўйича фикр билдирди, дея хабар бермоқда «Газета.uz» мухбири.
«Интернетда „Ўзбекистонни у қиламиз, бу қиламиз“, деган қандайдир чиқишлар бўлганини кўряпсизлар. Ўзбекистон ҳеч қачон ҳеч кимга мустамлака бўлмайди. Сизлар буни биласизлар, бу нарсани сизларга тарғибот қилишим керак эмас. Ҳаммангизнинг юрагингизда шу бор», — деди Сенат раиси.
Шунингдек, Танзила Нарбаева юқоридаги фикрларга қўшимча қилиб, нима учун жадидлар фаолиятини ўрганиш муҳимлигига тўхталди.
«Нима учун президентимиз жадидчилик фаолиятини олдинга суришга ҳаракат қиляптилар? Чунки буни ҳар биримиз билишимиз керак. Президент „Буларнинг ҳар бирини ўрганинглар“, деяптилар. Жадидларимиз ўй-хаёлларимиз ҳам, ишимиз ҳам бир бўлиши кераклигини қайд этган. Жадид оталаримиз, оналаримиз ўзимизни ҳар хил нарсалардан ҳимоя қилиб, ёруғликка чиқишимиз, замонавий илм-фан, замонавий касбларни эгаллашимиз кераклигига даъват этган», — дея қайд этди у.
«Улар неча йиллаб қоронғиликда қолиб кетган. Ҳозир ҳурматли президентимизнинг ҳаракатлари билан улар ёруғликка чиқди. Дунёни тарк этган бўлишса ҳам, уларнинг авлодлари бор. Мана шу авлодлар ҳозир хурсанд бўлишяпти, давлат мукофотларини олишяпти. [Жадидларимизнинг] барчаси оқланяпти. Мана шуларнинг барчасининг қадрига етишимиз керак», — деди Сенат раиси.
Бир неча кун аввал президент айни вақтда азалий қадриятлар, ижтимоий-сиёсий қарашлар тизимида чуқур трансформация жараёнлари юз бераётганини айтиб ўтганди.
«Илгари ўз мақсад ва манфаатларини асосан дипломатия ва сиёсат билан ҳимоя қилиб келган дунёдаги қудратли марказлар энди очиқчасига босим ўтказиш, қарама-қаршилик ва тўқнашувлар йўлига ўтганига ҳаммамиз гувоҳмиз. Афсуски, бундай кенг кўламли ва ўта зиддиятли жараёнларнинг таъсири Марказий Осиё минтақаси ва унинг таркибий қисми бўлган мамлакатимизни ҳам четлаб ўтмаяпти. Ана шундай ғоят мураккаб ва таҳликали вазиятда Ўзбекистоннинг миллий манфаатларига жавоб берадиган тўғри йўлни топиш, албатта, осон бўлмаяпти», — деганди давлат раҳбари.
Раҳбарларнинг бу каби баёнотлари россиялик сиёсатчи Захар Прилепиннинг Ўзбекистонни Россияга қўшиб олиш ҳақидаги таклифидан сўнг берилмоқда.
Бундан чиқиш ортидан Ўзбекистон ТИВ Россия элчисини вазирликка таклиф қилган бўлса, Мудофаа вазирлиги Ўзбекистон ўз хавфсизлигини таъминлаш учун етарли Қуролли Кучларга эга эканини таъкидлади.
Кейинроқ Россия Ташқи ишлар вазирлиги расмийси Мария Захарова суверенитетни ҳурмат қилиш ўзаро мажбурият экани, Прилепиннинг таклифи Россиянинг расмий позициясидан анча узоқдалигини маълум қилди.
