Шавкат Мирзиёев 18 декабрь куни бўлиб ўтган йиғилишда аҳолининг имтиёзли кредит ресурсларидан фойдаланишини осонлаштирадиган янги чора-тадбирларни маълум қилди, деб хабар қилди унинг матбуот котиби Шерзод Асадов.
Тадбиркорликни рағбатлантириш мақсадида «Оилавий тадбиркорлик» дастури доирасида ўз микро-бизнесини йўлга қўйган ва ижобий кредит тарихига эга аҳолига 50 миллион сўмгача гаровсиз кредитлар бериш йўлга қўйилади (ҳозирда — 33 млн сўм).
Фаолиятини кенгайтириб, тадбиркор бўлиш истагидаги аҳолига 100 миллион сўмгача гаровсиз кредит берилади, 50 фоизи банк картасига ўтказиб берилади.
Давлат раҳбари «бизнесга қадам қўяётган» якка тартибдаги тадбиркорларга кредит бериш таклифини ҳам маъқуллади. Ўзбекистонда шу кунгача 2,4 миллион киши якка тартибдаги тадбиркор сифатида рўйхатга олинган. Имтиёзли кредит йиллик 340 минг сўм ижтимоий солиқ тўланганидан кейин унинг картасига ўтказилади.
Август ойи бошида президент «маҳалла еттилиги» кафолати остида оилавий тадбиркорлик субъектлари учун гаровсиз кредитлар лимити 33 миллион сўмдан 100 миллион сўмга оширилишини маълум қилганди. Маблағларнинг бир қисмини нақд пул шаклида бериш режалаштирилган эди, аммо, кўринишидан, бу ғоядан воз кечилди.
Шу билан бирга, Шавкат Мирзиёев Марказий банкнинг икки вилоятдаги бош бошқармалари раҳбарларини, шунингдек, айрим ҳудудларда муаммоли кредитлар кўплиги сабабли бир қатор банк филиаллари раҳбарларини ишдан бўшатишни тавсия қилганди. Шунингдек, у оилавий тадбиркорлик кредити ҳисобидан техника ва маҳсулотлар харид қилиш тартибини танқид қилган.
Ноябрь ойида Ўзбекистонда якка тартибдаги тадбиркорлар шуғулланиши мумкин бўлган фаолият турлари рўйхати кенгайтирилган. Миллий тақинчоқлар, атлас ва адрас ишлаб чиқариш, қўзиқоринларни йиғиш, уйда етиштириш ва сотиш ва бошқалар шулар жумласидан.
«Газета.uz» Ўзбекистонда якка тартибдаги тадбиркор мақоми нимани англатишини, уни қандай олиш ва қандай имтиёзлар бериши ҳақида маълумот берган.
