Украина санкциялари рўйхатига Ўзбекистоннинг икки фуқароси ва икки компанияси киритилди. Владимир Зеленский 23 ноябрдаги фармони билан Миллий хавфсизлик ва мудофаа кенгашининг янги санкциялар бўйича рўйхатини тасдиқлади.
Рўйхатга Россия, БАА, Беларусь ва Ўзбекистонда рўйхатдан ўтган 93 та компания киритилган.
Улар орасида «Оҳангаронцемент» ва унинг эгаси ҳисобланган Akkermann Cement CA бор. Шунингдек, тадбиркор Алишер Усмоновнинг USM холдинги таркибига кирувчи Россиянинг Akkermann Cement компаниясига ҳам санкциялар жорий этилган.
Чекловлар рўйхатига холдингнинг бошқа компаниялари — «МегаФон», «Металлоинвест», USM Telecom, USM Cement, USM Gold, USM Urban Mining, USM Markirovka, Digital Invest, «Металлоинвест Трейдинг АГ» ва Hamriyah Steel FZC («Металлоинвест»га тегишли, БААда рўйхатдан ўтган) ҳам тушган.
Шунингдек, санкциялар рўйхатида косметика ишлаб чиқарувчи «Фаберлик», қандолат фабрикалари «Рот Фронт», «Красний Октябрь», «Бабаевский»лар ҳам бор.
Бундан ташқари, Усмоновнинг жияни Насиба Нарзиева ва унинг турмуш ўртоғи, аввал хабар қилинганидек, Hamriyah Steel бош директори экани айтиладиган Шоҳрух Носирхўжаевга нисбатан ҳам санкциялар қўлланган. Уларнинг иккаласи ҳам Ўзбекистон фуқаролари саналади.
Украина санкциялари 3, 5 ва 10 йил муддатга қўлланади, улар активларни блокировкалаш, лицензияларни бекор қилиш, Украина ҳудудида транзит ва савдо операцияларини, капитални чет элга олиб чиқиш, хусусийлаштириш ва ер сотиб олишни тақиқлашни назарда тутади.
Украина президенти Владимир Зеленский ўз нутқида санкциялар «Россия агрессияси учун ишлаётган ёки уларга ёрдам бераётган» шахсларга нисбатан жорий этилганини айтди. Шунингдек, улар Россиянинг муҳим инфратузилма билан боғлиқ бўлган субъектлари ҳисобланади. Зеленский яқин орада «санкциялар бўйича бошқа қарорлар ҳам бўлишини» қўшимча қилди. «Ҳар бир фамилия, ҳар бир компания номи — Россия террорининг давом этаётгани учун аниқ айбдорлик», — деди Владимир Зеленский.
Апрель ойида АҚШ Алишер Усмоновнинг USM холдинги ва унга алоқадор компанияларга қарши санкциялар жорий қилганди. Улар орасида Ucell уяли алоқа оператори ва Ўзбекистондаги маркировкалаш тизими операторини бошқарадиган Digital Holding улушига эга бўлган Digital Invest компанияси ҳамда «Оҳангаронцемент» ҳам бор. Шу билан бирга, АҚШ Молия вазирлиги истисно тарзида «МегаФон» ёки Digital Invest фойдасига ҳар қандай битимлар, жумладан, Америка товарлари ва технологиялари билан савдо қилиш учун муддатсиз лицензия берди, фақат бунда операциялар Ўзбекистон ёки Тожикистонда телекоммуникация хизматларини кўрсатишга қаратилган бўлиши кераклиги белгиланди. Санкцияларга Ўзбекистон фуқаролари ва келиб чиқиши ўзбекистонлик бўлган шахслар ҳам учраганди.
Ўзбекистон Марказий банки раиси Мамаризо Нурмуратов «Газета.uz»га бош вазир ўринбосари Жамшид Ходжаев бошчилигидаги ишчи гуруҳ «Оҳангаронцемент» акциядорлик жамияти ва унинг таъсисчисига нисбатан санкцияларни бекор қилиш бўйича иш олиб бораётганини маълум қилганди.
