Россия ҳукумати 17 ноябрь куни автомобиль бензинини мамлакатдан олиб чиқишга қўйилган вақтинчалик тақиқни бекор қилиш тўғрисида қарор қабул қилди. Бу ҳақда мамлакат Энергетика вазирлигига таяниб, «Интерфакс» хабар берди.
Россия ички бозордаги нархларни барқарорлаштириш мақсадида 21 сентябрдан автомобиль бензини ва дизель ёнилғиси экспортини вақтинчалик тақиқлаб қўйганди. 6 октябрда эса ҳукумат чекловларнинг бир қисмини олиб ташлаган ва дизель экспорт қилишга рухсат берган.
Энергетика вазирлигининг маълум қилишича, икки ой ичида «ички бозор тўйиниши таъминланган ва автобензин етказиб беришда, шу жумладан, биржа савдо каналида профицит яратилган». Маълумотларга кўра, экспорт тақиқланганидан бери биржадаги улгуржи нархлар «сезиларли даражада пасайган» ва автомобиль ёнилғиси захиралари қарийб 2 млн тоннага етган.
Аввалроқ Reuters агентлиги манбаларига таяниб, Россия келгуси ҳафта бензин ва дизель экспортига қўйилган тақиқни бекор қилишни режалаштираётгани ҳақида хабар берганди. Шунингдек, 8 ноябрь куни Россия энергетика вазири Николай Шулгинов ҳукумат Аи-95`гача бўлган бензиннинг барча маркалари экспортига қўйилган чекловларни бекор қилиш масаласини муҳокама қилаётганини маълум қилган.
Ўзбекистон энергетика вазири Жўрабек Мирзамаҳмудов аввалроқ Россия томонидан бензин ва дизель экспортига киритилган чекловлар Ўзбекистонга етказиб беришга таъсир қилмаганини, давлатлар ўртасида ҳукуматлараро келишув тузилганини билдирган. Эслатиб ўтамиз, йил бошида Ўзбекистонга бензин импортининг аксар қисми Россия ҳисобига тўғри келган.
Тармоқларда ёзишларича, Тошкентда Аи-95 сотиладиган ёнилғи қуйиш шохобчаларини топиш муаммо бўлаётгани туфайли аҳоли ёнилғи қуйиш учун Қозоғистонга бормоқда, у ерда бензин ва газ Ўзбекистонникидан 2 баравар арзонроқ экани айтилган.
Россиянинг «Лукойл» ёнилғи қуйиш шохобчасида Аи-95 нархи 14,5 минг сўмдан 18,5 минг сўмга ошган. Айрим шохобчаларда Беларусдан келтирилган Аи-95 бензин пайдо бўлган. Бензин маркалари нархларининг ошиши нефть нархининг 3,5 ой ичида биринчи марта 80 доллардан тушиши фонида содир бўлмоқда.
