Россия келгуси ҳафта бензин ва дизель ёнилғиси экспортига қўйилган тақиқни бекор қилишни режалаштирмоқда, дея хабар бермоқда манбаларига таяниб Reuters агентлиги.
Агентлик маълумотларига кўра, Россия ҳукумати ёнилғи ишлаб чиқарувчиларни чекловлар олиб ташланиши ҳақида хабардор қилган. Суҳбатдошлардан бири тақиқ 13 ноябрда бекор қилинишини айтган бўлса, иккинчиси чекловларни бекор қилиш қарори 19 ноябргача қабул қилинишини билдирган.
8 ноябрь куни Россия энергетика вазири Николай Шулгинов ҳукумат Аи-95`гача бўлган бензиннинг барча маркалари экспортига қўйилган чекловларни бекор қилиш масаласини муҳокама қилаётганини маълум қилди.
21 сентябрь куни дизель ёнилғиси ва бензин экспортига тақиқ жорий қилинганди. Экспорт тақиқи ёнилғи инқирозини тўхтатиш учун киритилган. 6 октябрда ҳукумат чекловларнинг бир қисмини олиб ташлаган, бу эса дизел ёнилғисини экспорт қилишга рухсат берган.
Ўзбекистон энергетика вазири Жўрабек Мирзамаҳмудов аввалроқ Россия томонидан бензин ва дизель ёнилғиси экспортига киритилган чекловлар Ўзбекистонга етказиб беришга таъсир қилмаганини ва давлатлар ўртасида ҳукуматлараро келишув тузилганини билдирган. Йил бошида Ўзбекистонга бензин импортининг аксар қисми Россия ҳисобига тўғри келган.
Тармоқларда ёзишларича, Тошкентда Аи-95 сотиладиган ёнилғи қуйиш шохобчаларини топишдаги муаммолар туфайли аҳоли ёнилғи қуйиш учун Қозоғистонга бормоқда, у ерда бензин ва газ Ўзбекистонникидан 2 баравар арзонроқ.
Россиянинг «Лукойл» ёнилғи қуйиш шохобчасида Аи-95 нархи 14,5 минг сўмдан 18,5 минг сўмга ошган. Айрим ёнилғи қуйиш шохобчаларида Беларусдан келтирилган Аи-95 бензин пайдо бўлган.
Бензин маркалари нархларининг ошиши нефт нархининг 3,5 ой ичида биринчи марта 80 доллардан тушиши фонида содир бўлмоқда.
