Ўзбекистон транспорт вазири ўринбосари Жасурбек Чориев Верона Евроосиё иқтисодий форумида яқинда Silk Avia авиакомпаниясининг Uzbekistan Airports таркибидан Uzbekistan Airways миллий авиаташувчиси тузилмасига ўтгани бўйича Spot нашрига изоҳ берди.
«Аввалдан Uzbekistan Airports авиация билан шуғулланмаслиги керак эди. Биз буни айтганмиз, барча экспертлар буни таъкидлашди, огоҳлантиришди», — деди у.
Унинг сўзларига кўра, Silk Avia бошиданоқ муаммоларга дуч келган, чунки ишлаб чиқарувчилар ёки лизинг берувчиларни жалб қилиш ва улар билан ишлашишнинг анъанавий усуллари авиакомпанияларга қаратилган.
«Биринчидан, Uzbekistan Airports авиакомпания эмас. Янги авиакомпания пайдо бўлганда, унинг репутацияси, тарихи, молиявий маълумотлари бўлмайди, шунинг учун ҳам авиакомпаниянинг очилиши ва самолётларни тезда қабул қилишига умид берувчи сўзлар бир афсона, эртакдир», — деган вазир ўринбосари.
Шунингдек, Жасурбек Чориев содир бўлиши мумкин бўлмаган фактларга очиқ кўз билан қараш кераклигини таъкидлаб, «шунинг учун биз ҳукумат томони билан бу жараённи тезлаштириш учун Silk Avia компаниясига ёрдам беришга мажбур бўлдик», дея хулоса қилди.
Вазир ўринбосари Silk Avia`ни хусусийлаштириш масаласи очиқлигича қолаётганини ҳам таъкидлади. Бироқ транспорт вазирлиги тегишли аризалар келиб тушган тақдирда минтақавий авиакомпанияни сотиш масаласини кўриб чиқишга тайёр.
Мамлакатнинг биринчи минтақавий авиакомпанияси ҳисобланган Silk Avia Uzbekistan Airports томонидан 2021 йил ноябрь ойида ташкил этилган. Уни ривожлантириш стратегияси Дубайнинг HAS Aviation GT компанияси томонидан ишлаб чиқилган. Айтилган мақсад Ўзбекистон ҳудудлари ўртасида авиақатновлар йўқлиги муаммосини ҳал қилиш эди. Компания 2023 йилнинг 25 апрелида илк мунтазам рейсларини амалга ошира бошлаган. Ўшанда Uzbekistan Airports бошқарув раиси Раъно Жўраева компанияни «авиамашрутка»га ўхшатганди. Silk Avia компаниясини ташкил этиш вақтида авиакомпания оёққа туриши билан хусусий секторга берилишини маълум қилганди.
Ўшанда транспорт вазири ўринбосари Жасур Чориев афсус билан «барча йўналишларда мунтазам автобус ва темир йўл қатнови мавжуд эмас»лигини тан олганди. Бундан ташқари, тез-тез турли транспортлар учун чипталар етишмовчилигини ҳам кузатиш мумкинлиги айтилганди.
«Янги авиакомпанияни жамоат транспорти деб таснифлаш мумкин. У ҳудудлар ўртасидаги транспорт қатновидаги бўшлиқларни ёпиши керак. Бу узоқ кутилган лойиҳа. Президентимиз бир неча бор ҳаво ҳаракатини ривожлантириш, ички рейслар ва биз жуда муҳтож бўлган долзарб йўналишларни зудлик билан тўлдириш бўйича кўрсатмалар берган», — деганди вазир ўринбосари.
Орадан бир неча ой ўтиб, август ойида Uzbekistan Airports раҳбари Раъно Жўраева 2,5 йиллик фаолиятидан сўнг ишдан бўшатилгани маълум бўлди. Компания кузатув кенгаши аъзоси Азиза Умарова унинг хизматларини таъкидлаб, «Жўраева олти ой ичида бошқалар 30 йил давомида ярата олмаган кичик авиацияни барпо этди», — деди.
Авиакомпания 2025 йилгача 10 та самолёт сотиб олишни режалаштирмоқда. Улардан бештаси тўғридан-тўғри ишлаб чиқарувчидан ATR самолётлари сотиб олинади. Ташувчи Британиянинг Jetcraft Commercial компанияси орқали Bangkok Airways`дан яна учта самолёт олди.
