Silk Avia минтақавий авиакомпанияси устав капиталидаги Uzbekistan Airports компаниясининг 100 фоиз улуши бренди сақлаб қолинган ҳолда Uzbekistan Airways авиакомпанияси таркибига кирувчи Uzbekistan Helicopters компаниясининг устав капиталига ўтказилади.
Бу президент Шавкат Мирзиёевнинг 16 октябрдаги «Авиация фаолиятини самарали ташкил этишга оид қўшимча чора-тадбирлар тўғрисида»ги қарорида назарда тутилган, деб хабар қилди Адлия вазирлиги.
Uzbekistan Аirports`га тегишли учта АТR72−600 самолёти Silk Avia компаниясига беғараз ўтказилади. Ушбу компанияга ривожланиш стратегияси доирасида АТR72−600 самолётлари сонини кўпайтириш вазифасини қўйилган.
Uzbekistan Helicopters компаниясига авиақатновларнинг сонини ошириш, парвозлар географиясини кенгайтириш, янги йўналишларни йўлга қўйиш ҳамда АТR72−600 русумли ҳаво кемалари паркини ривожлантириш вазифалари юкланади.
Мамлакатнинг биринчи минтақавий авиакомпанияси бўлмиш Silk Avia Uzbekistan Airports томонидан 2021 йил ноябрь ойида ташкил этилган. Уни ривожлантириш стратегияси Дубайнинг HAS Aviation GT компанияси томонидан ишлаб чиқилган. Айтилган мақсад Ўзбекистон ҳудудлари ўртасида авиақатновлар йўқлиги муаммосини ҳал қилиш эди. Компания 2023 йилнинг 25 апрелида илк мунтазам рейсларини амалга ошира бошлаган.
