AVO bank (собиқ «Ўзагроэкспортбанк») ўз устав капиталини қонун талаблари даражасига етказмади, дея хабар қилди Марказий банк матбуот хизмати.
«Банклар ва банк фаолияти тўғрисида»ги қонунга мувофиқ, банк устав капиталининг энг кам миқдори 2023 йил 1 сентябрдан эътиборан 200 млрд сўмни ташкил этилиши кераклиги белгиланган. AVO bank акциядорлик жамиятининг устав капитали эса бугунги кун ҳолатига 105 млрд сўмни ташкил этган ҳолда банк устав капитали миқдори қонунчилик талабларига мувофиқлаштирилмаган.
«Банклар ва банк фаолияти тўғрисидаги қонунчиликка мувофиқ, Банк назорати қўмитаси қарорига асосан банкка нисбатан кредитлаш ва бошқа харажатларни молиялаштириш ҳамда депозит операцияларини амалга ошириш тақиқланди», — дейилади Марказий банк хабарида.
Июнь ойида Марказий банк банкларни капиталлашув талаблари бажарилмаса, лицензиялари бекор қилиниши ҳақида огоҳлантирган ва уларга ўзаро бирлашишни тавсия қилганди.
Ўша ойнинг ўзида «Ўзагроэкспортбанк» устав капиталини 32 миллиард сўмдан 105 миллиард сўмга оширгани ва лицензия бекор қилинмаслиги учун уни 1 сентябргача 200 миллиард сўмга ошириш ниятида эканини маълум қилганди.
«Газета.uz» аввалроқ «Ўзагроэкспортбанк»ни хусусийлаштириш қандай амалга оширилгани ҳақида батафсил маълумот берганди.
