Ўзбекистон Марказий банки 25 сентябрдан бошлаб хорижий валюталарнинг ўзбек сўмига нисбатан янги қийматини белгилади.
Жума савдолари якунида АҚШ доллари курси дарҳол 22,06 сўмга — тарихий максимал 12 212,07 сўмгача кўтарилди.
22 сентябрь куни тижорат банклари долларни 12130−12200 сўмдан сотиб олди. Сотиш курси 12 230 сўмдан 12 275 сўмгача ўзгарди.
2022 йил охирида миллий валюта 3,94 фоизга, 2023 йил бошидан 25 сентябргача 8,6 фоизга қадрсизланди. 10 август куни кескин сакраш юз берди, доллар курси 408 сўмга мустаҳкамланди. Сўмнинг қадрсизланиши пул ўтказмалари ва экспортдан тушадиган валюта тушумларининг қисқариши фонида содир бўлмоқда.
Марказий банк раҳбари Мамаризо Нурмуратов июль ойи охирида миллий валютанинг қадрсизланишига импортнинг кучайиши босими ҳам сабаб бўлганини таъкидлади. Унинг сўзларига кўра, бу мавсумий ҳодиса бўлиб, бугунги валюта курси ташқи савдо операцияларининг ҳақиқий кўринишидир.
Кейинчалик регулятор иккиламчи ҳисобварақлар бўйича валюта операцияларини ёпиш орқали валюта чиқиб кетишини чеклашга уринди, бироқ жамоатчилик эътирозидан сўнг қарор бекор қилинди.
Статистика агентлиги маълумотларига кўра, саккиз ойда Ўзбекистоннинг ташқи савдо айланмаси 40 миллиард долларни ташкил этди, бу ўтган йилнинг шу даврига нисбатан 23,2 фоизга кўпдир. Экспорт 27,8 фоизга ошиб, 16,4 миллиард долларни, импорт эса 23,6 миллиард долларни (+17 фоиз) ташкил этди. Натижада ташқи савдо айланмаси сальдоси 7,2 миллиард доллар (-6,78 миллиард доллар) рекорд даражадаги манфий балансни кўрсатди.
