Ўзбекистон Марказий банки раиси Мамаризо Нурмуратов 27 июль куни бўлиб ўтган матбуот анжуманида миллий валютанинг девальвациясини импорт ҳажмининг ошиши босими билан изоҳлади, дея хабар берди «Газета.uz» мухбири.
Регулятор раҳбарининг сўзларига кўра, Марказий банк долларнинг сўмга нисбатан курси бўйича прогнозлар бермайди, чунки курс валюта бозоридаги талаб ва таклифдан келиб чиқиб шаклланади.
Йил бошидан буён доллар курси сўмга нисбатан 3,1 фоизга мустаҳкамланди, биргина июль ойининг ўзида миллий валюта 112 сўмга арзонлади. Йил бошидан буён импортнинг 17 фоизга ўсиши миллий валютага маълум даражада босим ўтказди, деди у.
«Ўтган йиллар билан солиштирсак, йилнинг бу даврида шундай мавсумийлик кузатилади, кўплаб импортчилар ташқи савдо операцияларини шу даврда амалга оширади. Агар 2019, 2020 ва 2021 йилларга назар ташланса, айнан шу даврда — иккинчи чорак охири ва учинчи чорак бошида импортимиз ошади. Шундан келиб чиқиб, валюта бозорида маълум босим бор», — деди Мамаризо Нурмуратов.
Шу билан бирга, Марказий банк раҳбари бу ҳолат миллий валютанинг қадрсизланишига олиб келмаслигини таъкидлади, чунки банклар ва корпоратив мижозлар «тегишли ликвидликка эга, бу эса уларга валютани эркин сотиш ва сотиб олиш имконини беради».
«Бугунги валюта курси ташқи савдо операцияларининг ҳақиқий кўринишини акс эттиради», — деди Мамаризо Нурмуратов.
Марказий банкнинг 27 июлдаги асосий курс бўйича баёнотида импорт динамикасида сезиларли ўсиш кузатилаётгани, бу бир томондан ички фаолликнинг ўсиши билан боғлиқ бўлса, иккинчи томондан валюта бозорида талабни оширувчи омил эканини қайд этганди.
Регулятор, шунингдек, валюта курсининг ўзгариши аҳоли ва тадбиркорлик субъектларининг инфляцион кутилмаларига таъсир этувчи асосий омиллардан бирига айланиб бораётганини билдирган.
