UzAuto Motors компанияси Chevrolet Captiva 5 кроссовери сотувини қайта йўлга қўйишни режалаштирмоқда. Бу ҳақда «Газета.uz»га компания матбуот хизмати хабар берди.
«Ҳозирда синов жараёни давом этмоқда. Натижадан келиб чиқиб [сотишни давом эттириш ёки тўхтатишга] қарор қилинади», — деди UzAuto Motors ва агар синовлар муваффақиятли ўтса, шартномалар 1−1,5 ой ичида очилиши мумкинлигини таъкидлади.
Captiva модели Ўзбекистон бозорига 2007 йилда кирган. Ўша йилнинг октябрь ойида мамлакатда автомобилни йиғиш бошланди. 2011 йил сентябрь ва 2017 йил февраль ойларида модель янгиланди. 2018 йил cентябрь ойида GM моделлар сафини янгилаш глобал стратегиясининг бир қисми сифатида ишлаб чиқариш тўхтатилиши эълон қилинди.
2021 йил cентябрь ойида UzAuto Motors янги 2022 йилги Chevrolet Captiva кроссоверининг тўртта комплектацияда сотилишини эълон қилди. Ўшанда нархлар 192,7 миллион сўмдан бошланганди. Бироқ, ўша йилнинг ноябрь ойида компания савдони тўхтатди. Сабаб сифатида модель Ўзбекистон иқлимига мос эмаслиги айтилганди.
