UzAuto Motors компанияси 2022 йилги янги Chevrolet Captiva кроссоверини тўртта комлектацияда сотишни бошлади.
Автомобиль 1,5 литрли турбо двигатель, 10,4 дюймли сенсорли экран, автоматик узатмалар қутиси, электр рули билан жиҳозланган.
Янги Chevrolet Captiva учун шартномани Chevrolet ваколатли дилерлик марказлари орқали тузиш мумкин.
Автомобил моделлари ва уларнинг нархлари (нархлар ҚҚСсиз кўрсатилган):
- бошланғич LT комплектация: 192 775 000 сўм;
- LT комплектация 5 ўринли: 238 086 957 сўм;
- LT комплектация 7 ўринли: 244 782 609 сўм;
- Premier комплектация 7 ўринли: 269 478 261 сўм.
Компания хабарига кўра, бошланғич LT ва LT 5 комплектациясидаги 5 ўринли автомобилни сотиб олиш истагида бўлган харидорлар, компаниянинг расмий дилерларида ариза қолдиришлари ёки расмий сайт инфо@uzautomotors.com орқали онлайн тарзда ариза юборишлари мумкин. Тўпланган аризаларнинг сонига қараб, компания ушбу автомобилнинг етказилиб берилишини таъминлайди.
Ушбу хабар нашр қилинган пайтда Chevrolet Captiva учун навбат аллақачон UzAUTO Savdo тизимида шаклланган эди. Хусусан, Premier тўплами учун буюртмалар 200 донадан ошди. Тахминий етказиб бериш муддати 2022 йил январь ойининг охирида кўрсатилган.
Captiva модели Ўзбекистон бозорига 2007 йилда кириб келган. Биринчи марта машинани катта блокли йиғиш 2007 йил октябрь ойида бошланган, 2011 йилнинг cентябр ойида ва 2017 йилнинг февралида модель янгиланган. Шунингдек, 2018 йилнинг cентябрида Captiva ишлаб чиқарилиши тўхтатилганди.
