Ижтимоий тармоқларда Тошкент аэропорти яқинида қурилаётган йўл ўтказгичнинг бешта тўсини қулагани акс этган видео пайдо бўлди.
Видеода 42 метрли тўсинлар қулагач, ердан чанг кўтарилаётганини кўриш мумкин.
Тўсинлар юк машинаси (кўринишидан кран) устига тушиб, унинг кабинасига зарар етказган. Одамлар ҳодиса жойига югуриб борган, сўнг улар тўсинлар остига ва машина кабинасига қараб, гўёки қурбонлар бор-йўқлигини текширган.
Аввалроқ ҳолат бўйича жиноят иши қўзғатилгани ва 3 нафар мансабдор гумонланувчи тариқасида ишга жалб қилиниб, процессуал тартибда ушлангани ҳақида хабар берилганди.
«Ўзбекистон темир йўллари» акциядорлик жамияти ўрнатиш вақтида тўсинлар «эҳтиётсизлик» туфайли тушиб кетганини маълум қилганди.
«Йўл ўтказгични замонавий қурилиш стандартлари асосида қайта қуриш» лойиҳаси буюртмачиси Тошкент шаҳри ҳокимлиги ҳузуридаги «Ягона буюртмачи хизмати» инжиниринг компанияси, бош лойиҳачиси «Кўприкқурилишлойиҳа» унитар корхонаси, бош пудратчи «Кўприкқурилиш» трести ҳисобланади. Шу билан бирга, «Газета.uz»нинг давлат харидлари порталидаги маълумотлардан аниқлашича, иккита лойиҳа компанияси билан шартнома тузилган — «Кўприкқурилишлойиҳа» ва Allegro Develop Project.
«Газета.uz» июль ойи охирида Ўзбекистон президенти Шавкат Мирзиёев танишган реконструкция лойиҳаси ҳақида батафсил маълум берганди.
