Ўзбекистон президенти топшириғи билан тузилган ишчи гуруҳ АҚШга мамлакатдаги энг йирик цемент заводларидан бири — «Оҳангаронцемент»га қарши жорий этилган санкциялар юзасидан ўз эътирозлари ва хавотирларини билдирди. Бу ҳақда Марказий банк раиси Мамаризо Нурмуратов «Газета.uz»га маълум қилди.
«Яқинда бизнинг ишчи гуруҳимиз Америкада бўлди. Муайян [масалалар] бўйича ўз эътироз ва хавотирларимизни билдирдик. Ҳозир ["Оҳангаронцемент"] фаолияти муаммоларсиз давом этмоқда, яъни [заводнинг] миллий валютадаги операциялари бўйича операциялар ҳеч қандай чекловлар қўлланилмаслигини аниқладик. Доллардаги операцияларга келсак, улар бўйича операциялар юзасидан мажбуриятлар давом этади. Экспорт масалалари бўйича эса индивидуал ёндашамиз», — деди у.
Унинг сўзларига кўра, ишчи гуруҳга бош вазир ўринбосари Жамшид Хрджаев бошчилик қилмоқда.
АҚШ апрелда «Оҳангаронцемент» ва Россия фуқароси бўлган Алишер Усмоновнинг USM холдинги таркибидаги компания томонидан таъсис этилган Akkermann Cement CA компаниясига қарши санкциялар жорий этган эди.
АҚШ Молия вазирлигининг Чет эл активларини назорат қилиш бошқармаси (OFAC) санкциялар рўйхатига киритилган бир қатор компаниялар, жумладан Akkermann Cement CA билан операцияларни 11 июлга қадар чеклашга лицензия берди.
Май ойи бошида Марказий банк раҳбари Мамаризо Нурмуратов «Оҳангаронцемент» мамлакатдаги энг йирик солиқ тўловчилардан бири экани, маҳаллий аҳоли бандлигини таъминлаётгани, шу боис «бу корхонанинг узлуксиз ишлаши биз учун муҳим» эканини таъкидлаган эди.
«Санкцияларга келсак, бу бизни жуда хавотирга солмоқда. У ерда («Оҳангаронцемент»да — таҳр.) 10 мингдан ортиқ киши ишлайди. Санкцияларни қўллаш [корхонанинг] ишини шу заҳотиёқ тўхтатиб туришни англатмайди. Биз бу борада АҚШ Молия вазирлиги, OFAC (АҚШ Молия вазирлигининг хорижий активларни назорат қилиш идораси — таҳр.) тузилмаси билан ишлаяпмиз. Муайян муддат берилган. Бу чекловлар уларнинг доллар билан ўтказган операциялари билан бевосита боғлиқ», — деганди у.
2021 йил май ойида Кипрнинг Lamanka Enterprises компанияси «Оҳангаронцемент» устав капиталидаги 84,197 фоиз улушни сотиб олди. Ўшанда битим суммаси 557,6 млрд сўмга баҳоланган. 2022 йил январида Британия Виржиния оролларининг Lamanka Enterprises ва Giacinttar компаниялари «Оҳангаронцемент»даги улушларини 1,88 трлн сўмга сотганини эълон қилди. Кейинроқ акциялар харидори Akkermann Cement CA экани маълум бўлди.
