Транспорт вазирлиги ҳузуридаги Йўл-қурилиш ишлари сифатини назорат қилиш инспекцияси томонидан 2023 йилнинг беш ойида 1519 та йўл объектида ўтказилган текширувлар давомида 389 та қоидабузарлик аниқланди, деб хабар қилди Транспорт вазирлиги матбуот хизмати.
Умумий фойдаланишдаги ҳамда минтақавий автомобиль йўлларини ва сунъий иншоотларни (туннеллар, кўприклар, йўл ўтказгичлар) қуриш, реконструкция қилиш, мукаммал ва жорий таъмирлаш, сақлаш объектларида текширишлар ўтказилган.
Ўрганиш натижаларига кўра «Ўзйўлинспекция» томонидан буюртмачи, пудратчи, лойиҳачи, сақловчи ва бошқа ташкилотларга қоидабузарликларни бартараф этиш юзасидан кўрсатмалар тақдим этилган бўлиб, шундан 254 таси мажбурий ҳисобланади. Маълум қилинишича, бугунги кунга қадар 202 та қоидабузарлик бартараф этилган.
Қўпол равишда қоидабузилишларга йўл қўйган ва давлат инспекторлари томонидан берилган кўрсатмаларни белгиланган муддатда бартараф этмаган мансабдорларга нисбатан тегишли чоралар қўлланиши учун 20 та маъмурий баённома расмийлаштирилиб, суд органларига юборилди ҳамда 14 та ҳолат бўйича 19,8 млн сўмлик жарима қўлланди.
52 та ҳолатда 1 миллиард 958 миллион сўмлик сифатсиз қурилиш-монтаж ишлари ҳажмини тўловдан чиқариб ташлаш тўғрисида талабнома киритилган. Ҳозиргача 619 миллион сўмлик 31 та талабнома бажарилган.
Ўзбекистон бош прокурори Ниғматилла Йўлдошев аввалроқ вазирлик ва идоралар бўйсунувидаги текширувчи органларнинг мустақиллигини шубҳа остига олганди.
Эслатиб ўтамиз, президент Шавкат Мирзиёев 11 июль куни қайта сайланганидан кейинги биринчи йиғилишда республика даражасидаги қатор раҳбарларни, жумладан, Автомобиль йўллари қўмитаси раиси Абдураҳмон Абдувалиевни лавозимидан озод қилганди. Унинг ўрнига аввал Бухоро вилояти ҳокимининг биринчи ўринбосари, автомобиль йўллари қўмитаси раҳбари ўринбосари лавозимларида ишлаб келган Жамшид Турсунов тайинланган.
