Ўзбекистон, Покистон ва Афғонистон Исломободдаги учрашувда «Термиз — Мозори Шариф — Кобул — Пешовар» трансафғон темирйўл линиясини қуриш бўйича музокараларнинг якуний босқичини бошлади, деб хабар берди «Ўзбекистон темир йўллари» компанияси матбуот хизмати.
Томонлар молиялаштириш механизмлари, қурилиш, техник тафсилотлар ва амалга ошириш муддатларини муҳокама қилмоқда, дейилади хабарда.
2021 йил февраль ойида Тошкентда Ўзбекистон, Афғонистон ва Покистон ўртасида «Мозори Шариф-Кобул-Пешовар» темирйўли қурилиши бўйича йўл харитаси имзоланганди. Лойиҳани май ойида тайёрлаш, йўл қурилиши эса 2021 йил сентябрида бошланиши режалаштирилганди. Аммо Афғонистонда ҳокимият алмашиши лойиҳани секинлаштирди. Бироқ декабрь ойида Афғонистон муваққат ҳукумати лойиҳага қўшилди. 2022 йил 18 июлда ушбу мамлакат ҳудудида Трансафғон темирйўлининг йўналишини ва лойиҳанинг техник-иқтисодий асосларини аниқлаш бўйича экспедиция ишлари бошланди.
Сешанба куни давлатлар Ўзбекистоннинг Термиз, Афғонистоннинг Мозори Шариф ва Лаҳор шаҳарларидан ўтиб, Харлачи чегара пункти орқали Покистонда тугайдиган темирйўл йўналиши бўйича қўшма протоколни имзолайди, деб хабар берди Покистоннинг Dawn нашри.
Ўзбекистон «Боштранслойиҳа» институти йўл қурилиши қийматини 4,6 миллиард долларга, Покистон 8,2 миллиард долларга баҳолаган. ОАВ хабарларига кўра, лойиҳа 4,8 миллиард доллардан 6 миллиард долларгача баҳоланган. У 573 км узунликдаги ва йилига 20 миллион тоннагача юк ташиш имкониятига эга бўлган автомобиль йўлини қуришни назарда тутади. Янги транспорт йўлаги Европа Иттифоқи, Россия, Ўзбекистон, Афғонистон, Покистон, Ҳиндистон ва ундан кейинги Жануби-Шарқий Осиё давлатларини боғлаши керак.
Шу билан бирга, линия ҳам юк, ҳам йўловчи ташишни қўллаб-қувватлайди.
Dawn нашрининг ўзбек томонига таяниб хабар беришича, темирйўл Ўзбекистон ва Покистон ўртасидаги юкларни етказиб бериш муддатини тахминан беш кунга қисқартиради. Товарларни ташиш нархи ҳам камида 40 фоизга арзонлашади. Лойиҳа 2027 йил охиригача якунланиши, 2030 йилга бориб эса поездлар йилига 15 миллион тоннагача юк ташиш имкониятига эга бўлиши тахмин қилинмоқда.
Покистон бу темирйўл қурилиши Марказий Осиёни Покистоннинг 230 миллион аҳолисига яқинлаштириб, Араб денгизи бўйидаги давлатлар билан савдо-сотиқ учун имкониятлар очишига умид қилмоқда.
ЎТЙ маълумотларига кўра, ҳар учала давлат ҳам «ўзаро манфаатли ҳамкорликка юқори қизиқиш ва тайёрлик кўрсатмоқда».
