TikTok`да Ўзбекистон ҳарбий хизматчилари ҳарбий техникаларда Россияга ёрдам бериш учун полигон ҳудудида шай бўлиб тургани, аммо вазият ўзгаргани учун боришдан қолдирилгани акс этган видео тарқалди. Мудофаа вазирлиги видео бўйича изоҳ берди.
Вазирликнинг қайд этишича, мазкур хабар ҳақиқатга тўғри келмайди. Тасвирланган видеода шу йилнинг март ойида Чирчиқ шаҳрида бўлиб ўтган Ватанпарварлик фестивалига жалб этилган техникалар акс этган.
Мудофаа доктринасига кўра, Ўзбекистон Республикасининг мудофаа соҳасидаги сиёсати бошқа давлатларнинг ички ишларига аралашмаслик, эҳтимол тутилган низоларни тинч йўл билан ҳал этиш тамойилларига асосланади.
«Республикамиздаги барча электрон нашрлар ва блогерлардан маълумотларни нотўғри талқин қилмасликларини сўраймиз. Эслатиб ўтамиз, асосланмаган ёлғон хабар тарқатганлик учун жавобгарлик мавжуд», — дея эслатган вазирлик.
Эслатиб ўтамиз, 23 июнь куни Вагнер ХҲК раҳбари Евгений Пригожин РФ Мудофаа вазирлигини ХҲК лагерига ракета ҳужумида айблаб, Мудофаа вазирлиги раҳбариятига қарши исён ва Москвага юришни эълон қилди. ХҲК жангчилари Ростов-Донга кириб, ҳарбий ва маъмурий объектларни эгаллаб олишди, шундан сўнг Пригожиннинг сўзларига кўра, 25 минг кишидан иборат бўлган гуруҳнинг алоҳида қисмлари Москва томон ҳаракатланишди. Улар Воронеждан ўтиб кетишга муваффақ бўлишгани хабар қилинганди.
Владимир Путин телевидение орқали русларга мурожаат қилиб, «орқадан пичоқ уриш» ва «хиёнат» ҳақида гапириб, исён ташкилотчилари «муқаррар жазога тортилишини» билдирди. Москва, Москва вилояти ва бошқа вилоятларда аксилтеррор чоралари кўрилди.
24 июнга ўтар кечаси Москвага қарши «адолат маршини» бошлаган Вагнер ХҲК раҳбари Евгений Пригожин ўз колонналарини ортга — дала лагерларига қайтаришга қарор қилди.
