Иқтисодиёт ва молия вазири Шерзод Кудбиев Давлат бюджети ва давлат мақсадли жамғармалари бюджетларининг 2022 йилдаги ижроси бўйича ҳисобот Қонунчилик палатасига бюджет кодексида белгиланган сўнгги муддатдан анча кечикиб киритилганини изоҳлади. Бу бўйича унга Қонунчилик палатаси мажлисида депутат Бекмирза Эшмирзаев савол берганди.
Вазир бу шахсан унинг камчилиги эканини айтиб, вазият трансформация ва бошқа жараёнлар билан боғлиқ эканини, бундай ҳолат бошқа такрорланмайди деб ўйлашини таъкидлади. Кудбиев берган маълумотга кўра, Қонунчилик палатасига ҳисобот 15 кун кечикиб киритилган.
«Жуда тўғри айтяпсиз, бу жуда катта бир камчилигимиз. Бу шахсан менинг вазир сифатида катта камчилигим. Ўйлайманки, биз тегишли ташкилий чораларни, тегишли хулосаларни чиқариб олдик. Бундан кейин ҳам чиқариб оламиз. Энди мана бу трансформация жараёнлари, бошқа жараёнлар, энди ўрганяпмиз, ўйлайманки, 15 кунга кеч қолиб киритдик. Мана шу 15 куннинг, албатта, ҳисобини тўғри қўйиб оламиз. Бу — бизнинг айбимиз. Ўйлайманки ва умид қиламан, бизда бу иккинчи қайтарилмайди», — деди Кудбиев.
Бюджет кодексига мувофиқ, Вазирлар Маҳкамаси Давлат бюджетининг ва давлат мақсадли жамғармалари бюджетларининг ижроси тўғрисидаги йиллик ҳисоботни Ҳисоб палатасининг хулосаси билан биргаликда ҳисобот йилидан кейинги йилнинг 15 майидан кечиктирмай Олий Мажлис палаталарига тақдим этиши керак.
Эслатиб ўтамиз, 2022 йил декабрь ойида Ўзбекистоннинг 2023 йилги давлат бюджети 15 декабрга қадар қабул қилиниши керак бўлганига қарамай, лойиҳа ҳануз жамоатчилик муҳокамаси учун тақдим этилмагани ва парламентга киритилмагани хабар қилинганди. Ҳукумат бу билан кетма-кет тўртинчи йил муддатларни бузганди.
