Uzbekistan Airways компанияси 16 июнь куни ҳисоб бўйича ўн саккизинчи Airbus — A320neo самолётини қабул қилиб олди. Тулузадаги заводдан Тошкентга учиб келган лайнер, анъанага кўра, сув аркаси билан кутиб олинди.
Аввалроқ лизингга олинган иккита A330 самолётида бўлгани каби, ушбу лайнер ҳам қуйруқ қисмига компания логотипи, двигателига эса Uzbekistan Airways ёзуви туширилган соддалаштирилган фюзелаж рангида қабул қилиб олинди. Йил охирига қадар олиб келиниши керак бўлган қолган тўртта A320neo самолётлари ҳам худди шундай рангга бўялади. Бу ташувчи яқин келажакда узоқ йиллардан буён ўзгармай келаётган ўз ливреяси — самолётлар ташқи кўринишини янгилашни режалаштираётгани билан боғлиқ.
Янги самолёт авиакомпаниянинг Airbus концерни билан ҳамкорлигига 30 йил тўлган кунда етиб келди. 1993 йилда худди шу куни Uzbekistan Airways (ўшанда — «Ўзбекистон ҳаво йўллари» эди) биринчи Airbus — A310 самолётини қабул қилиб олган эди. Шундай қилиб компания парки Ғарбда ишлаб чиқарилган самолётлар билан тўлишни бошлаган. Ушбу самолётда 1995 йилда илк бор Тошкент — Нью-Йорк — Тошкент йўналиши бўйича трансконтинентал рейси амалга оширилган.
Вақт ўтиши билан Uzbekistan Airways янада тежамкор A320/321 самолётларига ўта бошлади. Бугунги кунда авиакомпания паркида 29 та йўловчи ва юк ташиш самолётлари мавжуд бўлиб, уларнинг катта қисми Airbus самолётларидан таркиб топган. Илк A320neo самолёти 2019 йил баҳорида етказиб берилган. 2022 йил давомида компания бешта A320neo самолётини қабул қилиб олди.
Авиакомпания матбуот хизмати хабарига кўра, янги самолёт BOC Aviation компанияси томонидан узоқ муддатли лизинг асосида етказиб берилган. У битта тоифали конфигурацияда (фақат эконом-классда) 186 йўловчини ташишга мўлжалланган.
Авиакомпания бошқаруви раиси Шуҳрат Худайқуловнинг таъкидлашича, бундай қарор Ўзбекистондан рейсларга жиддий ортиб бораётган талабни қондириш мақсадида қабул қилинган. Йил охиригача барча бешта самолёт қабул қилингандан сўнг, уларни бизнес классли икки тоифали конфигурацияга айлантириш режалаштирилган.
A320neo ўз синфидаги энг шовқинсиз авиалайнер ҳисобланади. Учиш жараёнидаги товуш тарқалиши даражаси олдинги авлод ҳаво кемаларига қараганда 50 фоизга пастроқ. Бундан ташқари, ушбу турдаги ҳаво кемасида кондиционер тизими ҳам мавжуд, у ҳар икки дақиқада ҳавони тўлиқ янгилайди ва унинг бутун салон бўйлаб бир текис тақсимланишини таъминлайди.
