Ўзбекистонга 14 февраль куни Германиянинг Гамбург шаҳридан биринчи Airbus A321neo (LR) ҳаво кемаси олиб келинди, деб хабар бермоқда Uzbekistan Airways авиакомпанияси матбуот хизмати. Uzbekistan Airways авиакомпанияси Марказий Осиёда Airbus`нинг узоқ масофага мўлжалланган самолаётининг биринчи оператори бўлди.

UK32101 рўйхатга олиш рақамини олган самолёт 188 йўловчига (бизнес-классдаги 16 ўрин, эконом классида 172 ўрин) мўлжалланган ва CFM International LEAP-1A двигателлари билан жиҳозланган. Aвиакомпания A321LR дан маҳаллий ва халқаро йўналишлар бўйича фойдаланишни режалаштирмоқда.

Фото: Роман Валиев.

«Aвиакомпаниянинг яқин келажакдаги режалари — яқин ва узоқ хориж мамлакатларига парвозлар географиясини кенгайтириш, шунингдек, янги ва қулай самолётларни сотиб олиш орқали авиапаркини кенгайтириш бўйича фаол иш олиб бориш. Бунинг яққол мисоли бу йил охиригача қабул қилиб олинадиган бешта Airbus самолётларига буюртма берилишидир, — дейди Uzbekistan Airways бошқарув раиси Илҳом Маҳкамов.

Компания жами 5 та Airbus самолётларига буюртма берган: яна тўртта авиалайнер 2022 йилнинг охиригача етказиб берилади.

Илҳом Маҳкамов «Дарё» нашрига берган интервьюсида компания самолётлар паркини узоқ масофали A321neo янги версияси ёрдамида модернизациялашда давом этишини таъкидлаган. «LEAP двигателлари билан жиҳозланган комфорт-класс самолётларимиз Европа, Америка, Яқин Шарқ, Осиёнинг 22 та шаҳрига ва МДҲнинг 24 шаҳрига рейсларни амалга оширади, шунингдек, 11 та ички йўналиш бўйича фойдаланилади», — дейди у.

A321LR — бу катта ҳажмли ёқилғини сақлашга мўлжалланган учта қўшимча марказий бак (АCТ) туфайли 7400 кмгача бўлган масофага учиш имконини берадиган кенгайтирилган диапазонга эга А320neo`нинг версияси.

Аввалги авлод самолётларига нисбатан моделнинг ёқилғи сарфланиши, CO2 чиқиндилари ва ҳар бир ўриндиқ учун фойдаланиш харажатлари 30 фоизга камайтирилган.