8 июнь куни соат 12:30 атрофида Тошкентнинг Учтепа туманидаги Гулистон кўчасида Lacetti ва 94-йўналишда ҳаракатланаётган Yutong электробуси иштирокида ЙТҲ содир бўлди.
«Тошшаҳартрансхизмат» компанияси матбуот хизматининг хабар қилишича, электробус ўз йўлагида ҳаракатланиб кетаётган вақтда йўл четида турган маст ҳолатдаги Lacetti (давлат рақами 01 V 416 VB) ҳайдовчиси тўсатдан йўлнинг қатнов қисмига чиқиб, электробус билан ЙТҲ содир этган.
Авария натижасида тан жароҳати олганлар йўқ.
Бу бир ҳафта ичида электробуслар иштирокидаги учинчи ЙТҲ ҳисобланади. 5 июнь куни светофорнинг тақиқланган чироғида чиқиб келган Lacetti ҳайдовчиси Malibu ва 81-йўналишда ҳаракатланувчи электробус билан тўқнашув содир этган эди. Авария сабабчиси шифохонага ётқизилган. 6 июнь куни 89-йўналишдаги электробус қизил чироқда ҳаракатланган Cobalt билан тўқнашган, оқибатда енгил автомобиль ҳайдовчиси ҳаётдан кўз юмган эди.
