20 май куни Ўзбекистон Марказий банки учта тўлов ташкилотининг лицензияларини қайтариб олиш тўғрисида қарор қабул қилди, деб хабар берди регулятор матбуот хизмати.
Улар тўлов ташкилоти фаолиятини амалга ошириш ҳуқуқини берувчи лицензиясидан маҳрум бўлди тўлов ташкилотлари реестридан чиқарилди.
Instant Payment Solutions компаниясининг ўзи лицензияни бекор қилиш учун ариза берган. Илгари у Paynet тўлов хизмати билан боғлиқ эди. Компаниялар таъсисчилари MBCI Mont Blanc Commodities & Investments (Швейцария, 60%), тадбиркор ва инвестор Ботир Арифжонов (20%) ва Сардор Комилов (20%) эди.
Paynet (UzPaynet МЧЖ) энди давлатга тегишли (100%), Instant Payment Solutions эса ҳаракатсиз ҳолатдаги компанияга айланди.
Григорий Арзумановга тегишли Source to Pay «олти ойдан ортиқ вақт давомида фаолиятини тўхтатиб қўйгани сабабли» лицензиясидан маҳрум бўлди. Тўлов ташкилоти онлайн-савдогарлар учун «янги тўлов усули» яратишни режалаштирган ва ўзини электрон тижорат соҳасида фаолият юритувчи халқаро тўлов хизмати сифатида кўрсатган.
TAPP Payment компанияси (БААдаги Tap Payments билан ўхшаш номга эга) 2022 йил июнь ойида лицензия олган, бироқ «лицензия олинган кундан бошлаб бир йил ичида ўз фаолиятини амалга оширмагани учун» уни йўқотган, дея қайд этди Марказий банк.
Тўлов ташкилоти ўзининг TAPP UZ супер иловасини «Янги Ўзбекистон учун янги илова» сифатида ижтимоий тармоқларда 2022 йил апрелдан сентябргача тарғиб қилган. Июль ойида компания асосчиси Хуршид Тўраев Ахборот технологиялари ва коммуникацияларини ривожлантириш вазири Шерзод Шерматов билан учрашиб, компания фаолиятини кенгайтириш масалаларини муҳокама қилганди.
Source to Pay ва TAPP Payment қатор солиқ имтиёзларидан фойдаланадиган IT Park резидентлари ҳисобланади.
Ҳозирда Ўзбекистонда 51 та лицензияланган тўлов ташкилоти рўйхатга олинган.
Эслатиб ўтамиз, самарқандлик тадбиркор Хуршид Тўраев Тошкент шаҳри марказидаги Рақамли технологиялар вазирлиги ва «Алоқабанк» биноларини сотиб олиш бўйича тендерда ғолиб чиққан 8 миллион сўм устав капиталига эга Black Gold Industry News (таъсисчиси Зиёдулло Жалолов) билан алоқадор бўлиши мумкин.
Апрель ойининг бошида савдо битта таклифдан кейин якунланганди. Объектлар учун харидор 387 миллиард сўм таклиф қилган. Кимошди савдосидан бир кун аввал «Алоқабанк» ушбу компанияга 15 йил муддатга 14 фоиз ставкада 390 миллиард сўм кредит берган.
Марказий банк раиси Мамаризо Нурмуротов май ойи бошида аукцион натижалари ва имтиёзли кредитлар ажратиш бўйича келишув бекор қилингани ҳақида маълум қилганди.
