Самарқандлик тадбиркор Хуршид Тўраев Рақамли технологиялар вазирлиги ва Тошкент марказидаги «Алоқабанк» биноларини сотиб олиш бўйича тендерда ғолиб чиққан Black Gold Industry News компаниясига алоқадор бўлиши мумкин. Бу ҳақда у Instagram саҳифасида маълум қилди. Кейинчалик пост олиб ташланди.
Хуршид Тўраев «Газета.uz»нинг «Алоқабанк» кредити эвазига битта компания бино сотиб олгани ҳақидаги хабарининг скриншотини илова қилиб, изоҳига «[ўз] тадбиркорлик фаолиятидаги катта қадами» ҳақида ёзди.
«Бу сафар республикамизнинг қоқ марказида ҳамюртларимиз ва юртимиз меҳмонларимиз учун қулай макон яратишга киришдик», — деб ёзади у.
Инстаграм ҳикояларида у #sxfnewmakon хештеги билан янгиликнинг скриншотини ҳам жойлаштирди. Бу ном Қарши шаҳридаги SXF Qarshi Mall ва Самарқанд шаҳридаги SXF Makon Mall савдо-кўнгилочар марказлари номларига ўхшайди.
Давлат активларини бошқариш агентлиги матбуот хизмати аукционда ғолиб чиққан компаниянинг якуний бенефициарлари ҳақида маълумотга эга эмаслигини маълум қилди.
Хуршид Тўраев Самарқанд вилоятидаги йирик тадбиркорлардан бири бўлиб, у ерда заводлари, савдо марказлари ва Samarqand City мажмуасини қурган. У Global Garant Plast, Marakand Led Invest, Expected Homes, Tapp Payment, Sam Selin Textile, Urganch City Centr Stroy, Qoqon Marokand Mall-Center и Marokand Mall Center компаниялари таъсисчиси.
Тадбиркор «SXF Construction Group» қурилиш компанияси раҳбари, «SXF Samarqand Siti Stroy» ва бошқа лойиҳалар асосчиси сифатида қайд этилган. ЎзЛиДеП партияси аъзоси.
Устав капитали 8 миллион сўм бўлган Black Gold Industry News (таъсисчиси Зиёдулло Жалолов) апрель ойи бошида Рақамли ривожланиш вазирлиги ва «Алоқабанк»нинг биноларини сотиб олиш бўйича ўтказилган аукционда ғолиб чиқди. Битта таклифдан сўнг савдо якунланди. Объектлар учун харидор 387 миллиард сўм таклиф қилган. Кимошди савдосидан бир кун аввал «Алоқабанк» ушбу компанияга 15 йил муддатга 14 фоиз ставкада 390 миллиард сўм кредит берганди.
