Европа Иттифоқи давлатлари 10 май куни Россиянинг Украинадаги уруши муносабати билан янги санкцияларни муҳокама қилмоқда, бу учинчи давлат компанияларига қаратилган бўлиб, савдо чекловларини бузгани учун уларга экспорт бўйича чекловлар киритади, деб ёзмоқда Reuters.
Европа комиссияси президенти Урсула фон дер Ляйен аввалроқ янги санкциялар Россиянинг мавжуд савдо чекловларини четлаб ўтишни тўхтатишга қаратилгани ва улар G7 давлатлари билан «яқин ҳамкорликда» ишлаб чиқилганини айтганди.
«Агар биз товарлар Европа Иттифоқидан учинчи давлатларга кетаётганини, кейин эса Россияга етиб боришини кузатсак, аъзо давлатларга ушбу товарларни экспорт қилишга рухсат беришни таклиф қилишимиз мумкин. Бу восита сўнгги чора бўлади ва ундан эҳтиёткорлик билан фойдаланилади», — дея Урсула фон дер Ляйеннинг сўзларини келтиради Reuters.
Европа комиссияси томонидан тайёрланган таклиф билан танишган агентлик манбаларининг таъкидлашича, қора рўйхатга «ўнлаб» янги компаниялар, жумладан, Хитой, Эрон, Қозоғистон ва Ўзбекистон компаниялари киритилган.
Эслатиб ўтамиз, апрель ойи охирида Европа Иттифоқининг санкциялар бўйича махсус вакили Дэвид О’Салливан Европа Иттифоқи давлатларидан санкция қўйилган товарлар импорти кўпайиб бораётган давлатларга сафари доирасида Ўзбекистонга ташриф буюрган эди. Унинг сўзларига кўра, сўнгги пайтларда Европа Иттифоқидан Ўзбекистон ҳудуди орқали бундай товарлар экспорти 126 фоизга ошган.
Унинг таъкидлашича, гап юқори технологияли блок-схемалар, микрочиплар, қурол-яроғлар, бошқарув тизимлари, артиллерия ва қанотли ракеталар учун ишлатилиши мумкин бўлган оптик жиҳозлар ҳақида кетмоқда.
«Бу маҳсулотларни биз Россия ҳарбийларидан тортиб олинган, қўлга киритилган ҳарбий техникаларда топмоқдамиз. Биламизки, улар украиналикларни ўлдириш учун бир қатор маҳсулотлар ва қурол қисмларидан фойдаланадилар. Ва шунинг учун биз ушбу маҳсулотларни чегаралар орқали олиб ўтишга алоҳида эътибор беришни сўрадик», — деб тушунтирди Европа Иттифоқининг махсус вакили.
Унинг ташрифи давомида Ўзбекистонда ҳам давлат ташкилотлари ва тадбиркорлик субъектлари учун санкциялар бўйича ўқув семинарлари ўтказилди, унда Европа экспорти билан қандай ҳаракатлар ноқонуний экани ва санкцияларни четлаб ўтишга биргаликда қандай қарши курашиш кераклиги тушунтирилди.
Март ойи охирида Европа Иттифоқи Россияга «икки мақсадли» технологияларга эга ускуналар сотиб олишга ёрдам берадиган давлатларга савдо чекловларини жорий этишни режалаштираётгани хабар қилинганди.
