Январь-февраль ойларида Ўзбекистон хорижий давлатлардан қиймати 134,2 млн АҚШ долларига тенг бўлган 5026 та енгил автомобиль импорт қилган, дея маълум қилди президент ҳузуридаги Статистика агентлиги.
Автомобиллар Хитой (2540), Корея Республикаси (2081), АҚШ (217), Япония (58), Гонконг (56), Германия (36) ва БААдан (12) олиб келинган.
Енгил автомобиллар импорти ўтган йилнинг мос даври билан солиштирилганда 925 тага камайган.
Хусусан, 2022 йилнинг январь-февраль ойларида мамлакатга расман қиймати 124,5 млн долларлик 5948 дона (2021 йилнинг икки ойида 1075 та) автомобиль олиб кирилган. Ўшанда машиналар асосан Хитойдан (3436 та), Корея Республикасидан (1512 та) импорт қилинган, аммо АҚШ (19), Япония (15), Германия (9) ва Гонконгдан (5) анча кам келтирилган.
Шу билан бирга, импорт қилинган автомобилнинг ўртача нархи 20,9 минг доллардан 26,7 минг долларга (+27,7 фоиз) ошди.
Иқтисодчи Миркомил Холбоевнинг фикрича, бу тенденциянинг бир қисми ишлаб чиқарилган кундан бошлаб Ўзбекистон божхона чегарасини кесиб ўтиш вақтида бир йилдан ортиқ вақт ўтмаган янги автомобиллар учун божхона тўловларининг 30 фоиздан 15 фоизга камайиши билан изоҳланади.
«Яъни божларнинг пасайтирилиши нисбатан арзон автомобиль бозорида деярли ўзгаришга сабаб бўлмаган. Аммо нисбатан қиммат ҳамда альтернативаси маҳаллий ишлаб чиқарувчи томонидан ишлаб чиқарилмайдиган автомобилларни харид қилувчилар учун импорт қилишга қўшимча рағбат уйғотган бўлиши мумкин», — дея тахмин қилди у.
«Газета.uz» янги хорижий автомобиллар учун божхона тўловлари босқичма-босқич пасайтирилиши, аммо янги ҳамёнбоп ва эски машиналар учун амалда тақиқланганлигича қолиши ҳақида ёзган эди.
Бундан ташқари, президентнинг 2022 йил 16 апрелдаги қарори билан Ўзбекистонга двигатель ҳажми 3 литрдан ортиқ бўлган хорижий автомобиллар ва гибрид автомобилларни олиб кириш арзонлашди.
