Қирғизистоннинг собиқ президенти Алмазбек Атамбаев 14 февраль куни Молдовановка қишлоғидаги 27-колониядан озод қилинди, деб хабар бермоқда «Кабар» агентлиги.
Бир кун аввал Қирғизистон Олий суди судялар коллегияси «криминал авторитет» Азиз Батукаев иши доирасида янги ҳолатлар аниқлангани сабабли Алмазбек Атамбаевга нисбатан чиқарилган ҳукмни бекор қилди.
Эндиликда жиноий иш яна Бишкекнинг Первомайский туман судида кўриб чиқилади.
«Менга қарши барча жиноий ишлар уйдирма ва оқ ип билан тўқилган», деди Алмазбек Атамбаев журналистларга.
Соғлиги ҳақидаги саволга жавоб берар экан, зудлик билан даволаниши кераклигини айтди. «Чет элда даволаниш керак. Лекин ҳар доимгидек қайтаман. I’ll be back», деб ҳазиллашди собиқ президент.
Шу куни у Кой-Таш қишлоғидаги уйига етиб келди. Уни қариндошлари ва дўстлари кутиб олишди.
2020 йилнинг ёзида Первомайский суди Алмазбек Атамбаевни Азиз Батукаевни ноқонуний равишда озод қилгани учун 11,2 йилга озодликдан маҳрум қилган эди.
