Туркманистондаги энг йирик «Галкиниш» газ конида юз берган авария ва Ўзбекистонга газ етказиб беришда кузатилган узилишда айбланиб «Туркмангаз» давлат концернида олти киши ҳибсга олинди. Бу ҳақда Нидерландияда рўйхатдан ўтган Turkmen.news ахборот ва инсон ҳуқуқлари ташкилоти ҳукуматдаги манбаларга таяниб хабар берди.
Қўлга олинганлар орасида моддий-техника ресурслари ва таъминот бошқармаси бошлиғи Шоҳрат Аждаров ва «Туркменгазакдириш» («Туркмантрансгаз») уюшмаси раҳбари вазифасини бажарувчи Шоҳрат Чопановлар борлиги айтилмоқда.
Нашрнинг ёзишича, Бош прокуратура текшируви «Галкиниш» конидан Ўзбекистонга газ етказиб бериш тўхтатилган атиги олти кун ичида етказилган зарар миқдори 59,7 миллион долларни ташкил этиши мумкинлигини кўрсатди. Бундан ташқари, Туркманистонни Хитойга газ етказиб бермагани учун жарима кутмоқда.
Маълум қилинишича, авария январь ойидаги аномал совуқнинг энг юқори чўққисида «сифатсиз қуритиш датчиклари» ишламай қолгани сабабли содир бўлган. Turkmen.news манбасининг хабар беришича, расмий Тошкент Туркманистондан катта миқдорда пул компенсацияси талаб қилган.
«Музокаралардан сўнг Ўзбекистон суюлтирилган газни компенсация эквиваленти эвазига олишга кўндирди. Туркманистоннинг расмий ОАВларида суюлтирилган газнинг Ўзбекистонга ўтказилиши бепул ёрдам сифатида кўрсатилди», — дейилади хабарда.
Ўзбекистон Энергетика вазирлиги матбуот хизмати «Газета.uz»га Ўзбекистон газ таъминотидаги узилишлар учун компенсация талаб қилганини рад этди. «Бу мутлақо нотўғри», — деди Энергетика вазирлиги.
Статистика агентлигининг «Газета.uz»га тақдим этган маълумотларига кўра, 11 ой давомида (январь-ноябрь) Ўзбекистон Туркманистондан 154,2 миллион долларга 2,26 миллиард куб метр газ сотиб олган. Декабрь ойида етказиб бериш ҳажми 127,7 миллион долларни ташкил этди (2022 йил учун жами 281,9 миллион доллар, бу 2021 йилга нисбатан 82,5 фоизга кўп). Ўша ой президент администрацияси раҳбари Ашхободга ташриф буюриб, президент Сердар Бердимуҳаммедов билан учрашди ва қишки мавсум учун 1,5 миллиард куб метр газ етказиб бериш бўйича шартнома тузди.
Туркманистон совуқ туфайли юзага келган техник сабабларга кўра 12 январдан бошлаб Ўзбекистонга газ экспортини тўхтатди. Етказиб бериш 21 январдан тикланди.
