Бразилиялик футбол афсонаси Пеле 82 ёшида вафот этди, дея хабар берди AP. У футболчи сифатида ягона уч карра жаҳон чемпиони бўлган.
Пеленинг қизи Кели Насименто Instagram`да шундай деб ёзди: «Биз сиз туфайли ўзимизни топдик. Биз сизни чексиз даражада севамиз. Жойингиз жаннатда бўлсин».
«Футбол қироли» 2021 йилнинг сентябрида йўғон ичак ўсимтасини олиб ташлаш бўйича жарроҳлик амалиётини ўтказди ва деярли бир ой касалхонада ётди, шундан сўнг у бир неча бор касалхонага қайтди. Ноябрь ойи охирида футболчи ремиссияга эриша олмагани, шунингдек, коронавирус сабабли кучайган респиратор инфекцияси туфайли саратон терапиясини ўтказиш учун яна касалхонага ётқизилган эди.
22 декабрь куни шифокорлар Пеленинг саратони авж олгани, юрак ва буйраклар фаолиятининг бузилиши ҳам аниқлангани ҳақида хабар беришди.
Аввалроқ футболчининг яқинлари у билан хайрлаша бошлаганди. Бразилияда улар Пеленинг дафн маросимига ҳозирлик кўришни бошлашди.
Пеле Бразилия терма жамоаси сафида уч марта жаҳон чемпиони (1958, 1962, 1970) бўлган, 92 та ўйин ўтказган ва 77 та гол урган. Аргентиналик Диего Марадона билан биргаликда у ФИФА томонидан XX асрнинг энг яхши футболчиси сифатида тан олинган.
