Республика онкология маркази сотувдан олинди, дея хабар берди Давлат активларини бошқариш агентлиги. Аввалроқ, марказнинг икки филиали сотувдан олингани хабар қилинганди.
Республика ихтисослашган онкология ва радиология илмий-амалий тиббиёт маркази (Лот 3707620, бошланғич баҳоси 281,7 млрд сўм), унинг Тошкент вилоят (Лот 3707622, бошланғич баҳоси 92,1 млрд сўм) ва Тошкент шаҳар филиаллари (Лот 3707621, бошланғич баҳоси 160,5 млрд сўм) бино-иншоотлари янги Онкология марказининг бирлашган комплексини қуриш харажатларини қоплаш учун «E-auksion» электрон савдо платформаси орқали электрон-онлайн аукционга қўйилган эди.
Бугунги кунда, мазкур объектларнинг сотилиши ҳисобига янги замонавий Онкология маркази қурилишини амалга ошириш бўйича жамоатчилик фикридан келиб чиққан ҳолда, тегишли топшириққа асосан, Онкология маркази ҳамда унинг пойтахт ва Тошкент вилояти филиалларини аукцион орқали сотиш жараёни тўхтатилди ва савдодан олиб ташланди.
Эслатиб ўтамиз, марказ ва унинг икки филиали янги қурилаётган онкология комплексига кўчиб ўтиши режалаштириланди. Тошкентнинг Шифокорлар кўчасида қад ростлаётган мажмуанинг қуриш ишлари Вазирлар Маҳкамасининг ёпиқ қарори билан Mimar Group компаниясига топширилган.
