2 декабрь куни, тунда Ўзбекистонга COVID-19 га қарши эмлаш учун яна 2 308 410 доза Pfizer вакцинаси келтирилди. Бу ҳақда Соғлиқни сақлаш вазирлиги матбуот хизмати хабар бермоқда.
Бир ҳафта ичида Ўзбекистонга Pfizer вакцинасининг уч партияси олиб келинди. 28 ноябрь душанба куни ушбу вакцинанинг 142 740 дозалик ва 549 900 дозалик икки партияси етиб келганди.
Статистик маълумотларга кўра, ўтган ҳафтадан бошлаб, Ўзбекистонда коронавирус қайд этилган беморлар сони ошган.
Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабековнинг сўзларига кўра, мамлакатда грипп ва ўткир респиратор инфекциялар 2022−2023 йиллар куз-қиш мавсумида коронавирус инфекцияси билан микс-инфекция касаллиги сифатида, айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилмоқда.
«Санитария-эпидемиология хизмати томонидан тегишли вазирлик ва идоралар билан биргаликда профилактик ва эпидемияга қарши чора-тадбирларни амалга ошириш давом эттирилмоқда ва эпидемик вазият тўлиқ назорат остига олинган», — дея таъкидлади у.
