28 ноябрь, душанба куни Ўзбекистонга Pfizer вакцинасининг 549 900 дозаси етиб келди, деб хабар бердиССВ матбуот хизмати.
Аввалроқ вакцинанинг қарийб 143 минг дозаси келтирилгани ҳақида хабар берилганди.
ЮНИСEФ маълумотларига кўра, декабрь ойида Ўзбекистонга Pfizer вакцинасининг яна 3 млн дозаси келади.
Бугунги кунга қадар мамлакатда эмлаш жараёнида жами 72,5 млн доза вакцина қўлланилган бўлиб, шундан 6,7 миллиони Pfizer вакцинасидан олинган.
Статистик маълумотларга кўра, ўтган ҳафтадан бошлаб, Ўзбекистонда коронавирус қайд этилган беморлар сони ошган.
Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабековнинг сўзларига кўра, мамлакатда грипп ва ўткир респиратор инфекциялар 2022−2023 йиллар куз-қиш мавсумида коронавирус инфекцияси билан микс-инфекция касаллиги сифатида, айнан эмланмаган аҳоли ҳамда сурункали касалликлари мавжуд бўлган фуқаролар ўртасида қайд этилиши кузатилмоқда.
«Санитария-эпидемиология хизмати томонидан тегишли вазирлик ва идоралар билан биргаликда профилактик ва эпидемияга қарши чора-тадбирларни амалга ошириш давом эттирилмоқда ва эпидемик вазият тўлиқ назорат остига олинган», — дея таъкидлади у.
