29 ноябрда A гуруҳидан ўрин олган 3-тур учрашувлари бўлиб ўтди. Ушбу тур доирасида гуруҳдаги энг қизиқарли баҳс Эквадор — Сенегал бўлиши кутилаётган эди. Кутилганидек, учрашув қизғин суратларда ўтди ва унда Сенегал терма жамоасининг қўли баланд келди. Гуруҳдаги иккинчи баҳсда эса Нидерландия терма жамоаси Қатарни 2:0 ҳисобида мағлуб этди. Иккала баҳс ҳам бир хил вақтда, Тошкент вақти билан 20:00 да бошланди.
Эквадор — Сенегал 1:2
Ушбу баҳсда бизни қандай «интрига» кутаётгани тўғрисида плей офф босқичига чиқиш имкониятлари ҳақидаги мақолада ёзган эдик. Чунки Эквадор — Сенегал учрашуви плей-оффга чиқиш учун тўғридан-тўғри жанг эди. 4 очкога эга Эквадорни дуранг ҳам қаноатлантирарди. Аммо Сенегал учун бу камлик қиларди. Демак сенегалликлар ғалаба учун майдонга тушишган.
Эквадор — Сенегал баҳси «Халифа» стадионида 44 569 нафар томошабин қаршисида бўлиб ўтди. Ўйинда жамоалар жами 17 та зарба йўллашди — ҳисоб 7:10, Сенегал бу борада ҳам олдинда. Бироқ аниқ зарбалар борасида Эквадор пешқадам — 4:3. Сенегал дарвозабони 3 та сейв амалга оширган. Тўпга эгалик қилиш бўйича статистика ўйинда Эквадорнинг устун бўлганини кўрсатади — 61% га 39%.
Ўйиннинг 43-дақиқасида Эквадорнинг дарвозаси томон пеналти белгиланди. Сарр пеналтини муваффақиятли тарзда амалга оширди ва Сенегални ҳисобда олдинга олиб чиқди. 1-тайм 0:1 ҳисоби билан якунланди.
68-дақиқада Мойсес Кайседо ҳисобни тенглаштирди — 1:1. Аммо яна 2 дақиқа ўтгач, эквадорликлар яна гол ўтказиб юборишди. 70-дақиқада эквадорликларнинг жарима майдончаси ичидаги хатосидан Калиду Кулибали унумли тарзда фойдаланди ва тўпни дарвозага михлаб қўйди. Ҳисоб — 1:2!
Қолган дақиқаларда ўйин сурати янада ошди. Гоҳ Эквадор ҳисобни тенглаштириш учун Сенегал дарвозаси томон шошади, гоҳ сенегалликлар Эквадор терма жамоасидан тўпни олиб қўйиб буни голга айлантиришга ҳаракат қилади. Ҳакам 2-таймга 6 дақиқа вақт қўшиб берди, аммо ўйин 98-дақиқагача давом этди. Эквадор терма жамоаси гол кирита олмади, ҳисоб 1:2 лигича қолди, Сенегал терма жамоаси плей-оффда! Сенегалликлар ўйинда иккинчи жамоа сифатида ўйнаб, ғалабани илиб кетишди. Улар гуруҳдан иккинчи ўрин билан чиқишмоқда.
Плей-офф босқичида Сенегал терма жамоаси B гуруҳида 1-ўринни олган жамоа билан тўқнаш келади. Бу эса катта эҳтимол билан Англия, агар кутилмаган ҳодисалар юз берса, Эрон ёки АҚШ терма жамоаси бўлиши ҳам мумкин.
Нидерландия — Қатар 2:0
Нидерландия терма жамоаси плей-офф босқичига чиқиш масаласини деярли ҳал қилиб бўлган эди. Бироқ, улар фақат ҳали 1-ўринни нақд қилишмаган эди. Қатар терма жамоаси эса олдинги иккита турда мағлубиятга учраб, бирорта ҳам очко ололмаганди ва плей-оффга чиқиш учун курашни муддатидан аввал тарк этган эди.
Нидерландия — Қатар баҳси «Ал-Байт» стадионида бўлиб ўтди ва учрашувни томоша қилиш учну 66 784 нафар мухлси ташриф буюрди. Ўйинда жами 15 та зарба йўлланди: Нидерландия 10 та, Қатар 5 та.
Ўйиннинг 26-дақиқасида нидерландиялик Коди Гакпо ўйиндаги ҳисобни очди. Бу унинг ЖЧ-2022`даги учинчи голи. У ҳар бир турда биттадан гол уриб келмоқда. Учрашувнинг иккинчи гол 2-таймда киритилди: 49-дақиқада де Йонг дарвозабондан қайтиб келган (Депайнинг зарбасидан сўнг) тўпни осонлик билан киритиб қўйди. Ҳисоб — 2:0.
68-дақиқада Гакпо яна битта гол киритган эди, аммо у ҳужум давомида тўпга қўли билан ўйнагани маълум бўлди ва гол бекор қилинди. Ҳакам ўйинга 6 дақиқа қўшиб берди. Аммо қўшимча дақиқаларда ҳисоб ўзгармади. Ўйин Нидерландия терма жамоасининг 2:0 ҳисобидаги ғалабаси билан якунланди. Ана энди нидерландлар гуруҳда 1-ўринни нақд этишди.
Нидерландия плей-оффда B гуруҳида 2-ўринни эгаллаган терма жамоа билан тўқнаш келади. Бу ушбу гуруҳдаги исталган жамоа бўлиб қолиши мумкин. Аммо бу Эрон ёки АҚШ терма жамоаси бўлиши эҳтимоли катта.
Эслатиб ўтамиз, ЖЧ-2022`нинг плей-офф босқичига 3 декабр куни старт берилади.
